ന്യൂഡല്ഹി: ലോക്ക്ഡൗണ് മൂന്നാം ഘട്ടത്തിലേക്ക് നീട്ടിയതോടെ നിയന്ത്രണങ്ങള് കടുപ്പിച്ച് സംസ്ഥാനങ്ങള്. ഹരിയാനയും ഉത്തര്പ്രദേശും അതിര്ത്തികള് പൂര്ണമായും അടച്ചതോടെ ഡല്ഹി ഒറ്റപ്പെട്ട അവസ്ഥയിലായി. അതിര്ത്തി കടക്കാന് ഡോക്ടര്മാര് ഉള്പ്പെടെ ആര്ക്കും ഇളവില്ലെന്നാണ് ഹരിയാനയുടെ നിലപാട്.
യുപിയില് നിന്നും ഹരിയാനയില് നിന്നും ഡല്ഹിയിലേക്കുള്ള നാല് പാതകളും അടച്ചു. അതിര്ത്തി കടക്കാന് ഉത്തര്പ്രദേശ് പ്രത്യേക കര്ഫ്യൂ പാസ് ഏര്പ്പെടുത്തി. ഡല്ഹിയിലേക്കോ, ഡല്ഹിക്ക് പുറത്തേക്കോ യാത്ര ചെയ്യേണ്ട ആരേയും ഹരിയാന കടത്തി വിടില്ല. അതിര്ത്തിക്കപ്പുറത്ത് ജോലി ചെയ്യുന്ന പൊലീസുകാര്ക്കും ഇവിടെ ഇളവില്ല.
ഡല്ഹിയിലെ എല്ലാ ജില്ലകളും റെഡ് സോണില് വന്നതോടെയാണ് അയല് സംസ്ഥാനങ്ങള് നിയന്ത്രണം കടുപ്പിച്ചത്. ഡല്ഹിയില് ജോലി ചെയ്യുന്ന നിരവധി ആളുകള് ഗുഡ്ഗാവ്, നോയിഡ എന്നിവിടങ്ങളില് താമസിക്കുന്നുണ്ട്. ഇവരെ നിയന്ത്രണങ്ങള് ബാധിക്കും. ചരക്ക് വാഹനങ്ങള്ക്ക് നിര്ബന്ധമാക്കിയിരുന്ന പ്രത്യേക പാസ് വെള്ളിയാഴ്ച കേന്ദ്ര ആഭ്യന്തര മന്ത്രാലയം ഇറക്കിയ ഉത്തരവിനെ തുടര്ന്ന് ഹരിയാനയും ഉത്തര്പ്രദേശും പിന്വലിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ