കശ്മീരിൽ ഒരു ജവാന് വീര മൃത്യു; രണ്ട് ഭീകരരെ സുരക്ഷാ സേന വധിച്ചു

ശ്രീനഗർ: ജമ്മു കശ്മീരിലെ ഭീകരവാദികളും സുരക്ഷാ സേനയും തമ്മിലുണ്ടായ ഏറ്റുമുട്ടലിൽ ഒരു ജവാന് വീര മൃത്യു. സംഭവത്തിൽ രണ്ട് ഭീകരവാദികളെ സുരക്ഷാ സേന വധിച്ചു. ഇന്ന് പുലർച്ചെ ദോഡ ജില്ലയിലെ ഗുഡ്‌നാ വന മേഖലയിലാണ് ഏറ്റുമുട്ടൽ നടന്നത്. 

10 രാഷ്ട്രീയ റൈഫിൾസ് (രജപുത് റജിമെന്റ്), സിആർപിഎഫ്, പൊലീസ് എന്നിവരുടെ സംയുക്ത സംഘമാണ് ഭീകരവാദികളെ നേരിട്ടത്. പ്രദേശത്ത് ഭീകരവാദികൾ ഒളിച്ചിരിക്കുന്നതായി രഹസ്യ വിവരത്തെ തുടർന്ന് ശനിയാഴ്ച രാത്രിയാണ് സംയുക്ത സേന തിരച്ചിൽ ആരംഭിച്ചത്.

ഞായറാഴ്ച പുലർച്ചെയോടെ ഭീകരർ ഒളിഞ്ഞിരിക്കുന്ന കേന്ദ്രം സുരക്ഷാ സേന കണ്ടെത്തി. തുടർന്ന് ഇവിടം വളഞ്ഞതിന് പിന്നാലെ ഭീകരരുമായി ഏറ്റുമുട്ടൽ ആരംഭിച്ചു. ഏറ്റുമുട്ടൽ അവസാനിച്ചിട്ടില്ലെന്നാണ് ഒടുവിൽ ലഭിക്കുന്ന വിവരം.