ചെന്നൈ : സീരിയല് നടന് സെല്വരത്നത്തെ വെട്ടിക്കൊലപ്പെടുത്തിയ കേസില് ഒരാള് അറസ്റ്റില്. വിരുദുനഗര് സ്വദേശി വിജയകുമാറിനെ (30) ആണ് എംജിആര് നഗര് പൊലീസ് അറസ്റ്റ് ചെയ്തത്. വിജയകുമാറിന്റെ ഭാര്യയും നടന് സെല്വരത്നവും തമ്മില് അടുപ്പത്തിലായിരുന്നു. ഇതേത്തുടര്ന്നാണ് നടനെ കൊലപ്പെടുത്തിയതെന്നാണ് പൊലീസ് പറയുന്നത്.
കൊലപാതകത്തിന്റെ സിസിടിവി ദൃശ്യങ്ങള് പൊലീസിന് ലഭിച്ചിരുന്നു. അതില് വിജയകുമാറിന്റെ സാന്നിധ്യമുണ്ടെന്ന് പൊലീസ് സൂചിപ്പിച്ചു. വിജയകുമാര് നേരത്തെ സെല്വരത്നത്തെ കൊല്ലുമെന്ന് ഭീഷണിപ്പെടുത്തിയിരുന്നതായും പൊലീസ് സൂചിപ്പിച്ചു.
തമിഴ് സീരിയല് നടനായ സെല്വരത്നത്തെ രണ്ടു ദിവസം മുന്പാണ് അജ്ഞാത സംഘം വെട്ടിക്കൊന്നത്. ശ്രീലങ്കന് അഭയാര്ഥികളാണ് സെല്വരത്നവും വിജയകുമാറും. 2005 ല് ജോലി തേടിയാണ് സെല്വരത്നം ചെന്നൈയിലെത്തിയത്. തുടര്ന്ന് തമിഴ് മിനി സ്ക്രീന് രംഗത്ത് ചെറിയ വേഷങ്ങള് ചെയ്ത സെല്വരത്നം, വിജയ് ടിവിയിലെ തേന്മൊഴി ബിഎ എന്ന സീരിയലിലൂടെ ശ്രദ്ധേയനാകുകയായിരുന്നു.
കഴിഞ്ഞ ശനിയാഴ്ച സീരിയല് ചിത്രീകരണത്തിനു പോകാതെ സെല്വരത്നം സുഹൃത്തിനൊപ്പം തങ്ങി. ഞായറാഴ്ച പുലര്ച്ചെ ഒരു ഫോണ് കോള് വന്നതിനെ തുടര്ന്ന് പുറത്തേക്കു പോകുകയായിരുന്നു. ഞായറാഴ്ച രാവിലെ 6.30 ന് എംജിആര് നഗറില് വച്ചാണ് സെല്വരത്നം ആക്രമിക്കപ്പെട്ടത്. ഓട്ടോറിക്ഷയില് എത്തിയ അക്രമികള് കുത്തിയും വെട്ടിയും നടനെ കൊലപ്പെടുത്തുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ