ഭോപ്പാല്‍: പത്തുദിവസത്തോളം പഴക്കമുള്ള അജ്ഞാത മൃതദേഹം ആശുപത്രിയിലെ മോര്‍ച്ചറിയിലെ സ്‌ട്രെക്ചറില്‍ അഴുകിയ നിലയില്‍ കിടക്കുന്നതായി കണ്ടെത്തി. ആശുപത്രി അധികൃതരുടെ അനാസ്ഥയ്‌ക്കെതിരെ അന്വേഷണത്തിന് ഉത്തരവിട്ടു.
മധ്യപ്രദേശിലെ പ്രധാന ആശുപത്രികളിലൊന്നാണ് എംവൈ ആശുപത്രി. മൃതദേഹത്തിന് പത്തുദിവസത്തെ പഴക്കമുണ്ട്. ആശുപത്രിയിലെ മോര്‍ച്ചറിയിലെ ഒഴിഞ്ഞകോണില്‍ സ്‌ട്രെക്ചറില്‍ ഉപേക്ഷിച്ച നിലയിലായിരുന്നു മൃതദേഹം. ആശുപത്രിയില്‍ ദുര്‍ഗന്ധം രൂക്ഷമായതോടെയാണ് അഴുകിയ നിലയില്‍ മൃതദേഹം കണ്ടെത്തിയത്.
സാധാരണനിലയില്‍ അജ്ഞാത മൃതദേഹങ്ങള്‍ ഏഴ് ദിവസം ഫ്രീസറില്‍ സുക്ഷിക്കാറുണ്ടെന്നും അതിന് ശേഷം മുന്‍സിപ്പല്‍ കോര്‍പ്പറേഷനെ അറിയിച്ച ശേഷം മൃതദേഹം നീക്കം ചെയ്യാറുമാണ് പതിവെന്ന് ആശുപത്രി അധികൃതര്‍ പറഞ്ഞു. എന്തുകൊണ്ടാണ് ഈ മൃതദേഹം ഫ്രീസറിലേക്ക് മാറ്റാത്തതുള്‍പ്പെടെയുള്ള കാര്യം അന്വേഷിക്കുമെന്ന് അധികൃതര്‍ വ്യക്തമാക്കി
കോവിഡ് രോഗികളുടെയും മറ്റുരോഗികളുടെയും നിരവധി മൃതദേഹങ്ങളാണ് ഓരോ ദിവസവും ആശുപത്രിയിലെ മോര്‍ച്ചറിയില്‍ എത്തുന്നത്. എന്നാല്‍ ഇവിടെ മൃതദേഹങ്ങള്‍ സൂക്ഷിക്കാന്‍ 16 ഫ്രീസറുകള്‍ മാത്രമെയുള്ളുവെന്നും അതിനാല്‍ ഫ്രീസറുകളുടെ എണ്ണം വര്‍ധിപ്പിക്കാന്‍ ബന്ധപ്പെട്ടവരോട് ആവശ്യപ്പെട്ടിരുന്നതായും ആശുപത്രി അധികൃതര്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
