ബംഗളൂരു: കർണാടകയിൽ ബൈക്കിന്റെ ഹാൻഡിൽ കുടുങ്ങിയത് അറിയാതെ ഡ്രൈവർ മിനിലോറി മുന്നോട്ടെടുത്തതിനെ തുടർന്ന് രണ്ട് വിദ്യാർഥികൾക്ക് ദാരുണാന്ത്യം. പത്തുമീറ്ററോളം ബൈക്ക് വലിച്ചിഴച്ച ശേഷമാണ് ലോറി നിർത്തിയത്. ബെന്നാർഘട്ടയിലെ എഎംസി കോളജ് വിദ്യാർഥികളായ കൗശിക് (19), സുഷമ (19) എന്നിവരാണ് മരിച്ചത്.
വ്യാഴാഴ്ച വൈകീട്ടാണ് അപകടം.ബെന്നാർഘട്ട ബയോളജിക്കൽ പാർക്കിൽനിന്ന് മടങ്ങുന്നതിനിടെയായിരുന്നു ദാരുണ സംഭവം. ഹാൻഡിലിലെ കണ്ണാടി ലോറിയിൽ കുടുങ്ങിയതോടെ ബൈക്ക് റോഡിലേക്ക് മറിയുകയായിരുന്നു. ഇതോടെ ഇരുവരും തലയടിച്ച് വീണു. പത്തുമീറ്ററോളം ബൈക്കിനെ വലിച്ചിഴച്ച് മുന്നോട്ടുപോയശേഷമാണ് ലോറി നിർത്തിയത്. മറ്റു ബൈക്കുകളിൽ ഉണ്ടായിരുന്ന കൂട്ടുകാർ ഒച്ചവെച്ചതിനെ തുടർന്നാണ് ലോറി നിർത്തിയത്.സംഭവശേഷം ഡ്രൈവർ ഓടിരക്ഷപ്പെട്ടു.
ഇരുവരെയും സമീപത്തെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. സംഭവത്തിൽ ബെന്നാർഘട്ട പൊലീസ് കേസെടുത്ത് അന്വേഷണം തുടങ്ങി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ