കൂലിയായി നല്‍കിയത് 30 രൂപ; 5 വയസുകാരനെ തട്ടിക്കൊണ്ടുപോയി, കൊലപ്പെടുത്തിയ ശേഷം പ്ലാസ്റ്റിക് ബാ​ഗിലാക്കി കുഴിച്ചിട്ടു; മൃതദേഹം പുറത്തെടുത്ത് കുഴൽക്കിണറിൽ തള്ളി; അറസ്റ്റ്

ലക്നൗ: ജോലി ചെയ്​തതിന്​ തുച്ഛമായ വേതനം നൽകിയ​ തൊഴിലുടമയുടെ മകനെ തട്ടിക്കൊണ്ടുപോയി കൊലപ്പെടുത്തി. അഞ്ചുവയസുകാരൻ ആദിത്യയാണ്​ കൊല്ലപ്പെട്ടത്​. 16 വയസായ രണ്ടുപേരാണ്​ അറസ്റ്റിലായത്​. ഇരുവരെയും ​ജൂവനൈൽ ഹോമിലേക്ക്​ മാറ്റി. ഉത്തർപ്രദേശിലെ അലി​ഗഡിലാണ് സംഭവം.

ഫെബ്രുവരി 13നായിരുന്നു കേസിന്​ ആസ്​പദമായ സംഭവം. വയലിൽ പണിയെടുത്ത പ്രായപൂർത്തിയാകാത്ത ഇവർക്ക​ തൊഴിലുടമ കൂലിയായി 30 രൂപയും 50 രൂപയുമാണ്​ നൽകിയത്​. തുടർന്ന്​ ഇരുവരും തൊഴിലുടമയോട്​ വൈരാഗ്യം ​പുലർത്തിയിരുന്നു. പിതാവിനെ വേദനിപ്പിക്കുന്നതിനായി ഇവർ മകനെ കൊലപ്പെടുത്തുകയായിരുന്നു.

കൊലനടത്തുന്നതിനായി ഇവർ കുറ്റകൃത്യ പരമ്പരകൾ കണ്ടിരുന്നു.  വീട്ടുമുറ്റത്ത്​ കളിച്ചുകൊണ്ടിരുന്ന അഞ്ചുവയസുകാരനെ ഇരുവരും ചേർന്ന്​ തട്ടിക്കൊണ്ടുപോയി കടുക്​ വയലിൽ എത്തിച്ചശേഷം കൊലപ്പെടുത്തുകയായിരുന്നു. പിന്നീട്​ പ്ലാസ്റ്റിക്​ ബാഗിലാക്കി കുഴിച്ചിട്ടു.

എന്നാൽ ഫെബ്രുവരി 14ന്​ കുട്ടിയുടെ മൃതദേഹം കുഴൽക്കിണറിൽ ഉണ്ടാകുമെന്ന്​താന്ത്രികൻമാർ കുട്ടിയുടെ കുടുംബത്തോട്​ പറഞ്ഞതായി ഗ്രാമത്തിൽ വാർത്ത പരന്നു. ഇതോടെ കൗമാരക്കാർ കുട്ടിയുടെ മൃതദേഹം പുറത്തെടുത്തശേഷം കുഴൽക്കിണറിന്​ സമീപം തള്ളുകയും വസ്​ത്രവും ചെരിപ്പും കത്തിക്കുകയുമായിരുന്നു. കുട്ടിയുടെ മൃതദേഹം പിന്നീട്​ കുഴൽക്കിണറിൽ നിന്ന്​ കണ്ടെത്തുകയായിരുന്നു.

പൊലീസ്​ പ്രതികളെ പിടികൂടി. പിതാവി​നോടുള്ള പകയാണ്​ മകനെ കൊലപ്പെടുത്താൻ കാരണമെന്ന്​ ഇരുവരും മൊഴി നൽകി.