111 ദിവസത്തിനിടയിലെ ഏറ്റവും കുറഞ്ഞ കോവിഡ് കണക്ക്, ഇന്നലെ രോ​ഗികൾ 35,000ൽ താഴെ; ചികിത്സയിലുള്ളവർ നാലരലക്ഷത്തിലേക്ക് 

ന്യൂഡൽഹി: രാജ്യത്ത് പ്രതിദിന കോവിഡ് കേസുകൾ കുറയുന്നു. ഇന്നലെ 111 ദിവസത്തിനിടയിലെ ഏറ്റവും കുറഞ്ഞ കോവിഡ് കണക്കാണ് രേഖപ്പെടുത്തിയത്. 34,703 പേർക്കാണ് വൈറസ് ബാധ സ്ഥിരീകരിച്ചത്. ഇതോടെ ചികിത്സയിലുള്ള രോ​ഗികളുടെ എണ്ണം 4,64,357 ആയി താഴ്ന്നതായി കേന്ദ്രസർക്കാർ കണക്കുകൾ വ്യക്തമാക്കുന്നു. 97.17ശതമാനമാണ് രോ​ഗമുക്തി നിരക്ക്.

കോവിഡ് മൂന്നാം തരം​ഗം അടുത്ത മാസം സംഭവിച്ചേക്കാമെന്നാണ് എസ്ബിഐയുടെ റിപ്പോർട്ട് പ്രവചിക്കുന്നത്.സെപ്റ്റംബറിൽ ഇത് മൂർധന്യത്തിൽ എത്തിയേക്കും.അതിനാൽ ജാ​ഗ്രത തുടരണമെന്നും റിപ്പോർട്ടിൽ പറയുന്നു.ഒക്ടോബറിൽ കോവിഡ് കേസുകൾ മൂർധന്യത്തിൽ എത്തിയേക്കുമെന്നാണ് വിദ​ഗ്ധ സമിതിയം​ഗം കഴിഞ്ഞ ദിവസം പ്രവചിച്ചത്.കോവിഡ് മാനദണ്ഡം കൃത്യമായി പാലിച്ചില്ലെങ്കിൽ ഇത് സംഭവിച്ചേക്കുമെന്നും റിപ്പോർട്ടിൽ വ്യക്തമാക്കുന്നു.

രാജ്യത്ത് കോവിഡ് കേസുകൾ കുറയുന്നുണ്ടെങ്കിലും കേരളം ഉൾപ്പെടെ ചില സംസ്ഥാനങ്ങളിൽ കോവിഡ് കേസുകൾ കാര്യമായി കുറഞ്ഞിട്ടില്ല.കേരളത്തിൽ പത്തുശതമാനത്തിന് മുകളിലാണ് രോ​ഗസ്ഥിരീകരണ നിരക്ക്. പ്രതിദിനം പതിനായിരത്തിന് മുകളിൽ രോ​ഗികളാണ് ചികിത്സ തേടുന്നത്.