'നിങ്ങളുടെ ഫോണിലുള്ളതെല്ലാം അയാള് വായിക്കുന്നു' ; ഒളിയമ്പുമായി രാഹുല്
ന്യൂഡല്ഹി : ഫോണ് ചേര്ത്തല് വിവാദത്തില് ഒളിയമ്പുമായി കോണ്ഗ്രസ് നേതാവ് രാഹുല്ഗാന്ധി. നിങ്ങളുടെ ഫോണിലുള്ളതെല്ലാം അയാള് വായിക്കുന്നു എന്നാണ് രാഹുല് ട്വീറ്റ് ചെയ്തത്. പ്രത്യേകിച്ച് ആരുടെയെങ്കിലും പേരോ ഒന്നും പരാമര്ശിക്കാതെയാണ് രാഹുലിന്റെ ട്വീറ്റ്.
രാജ്യ സുരക്ഷ ഭീഷണി നേരിടുകയാണെന്ന് ലോക്സഭയിലെ കോണ്ഗ്രസ് കക്ഷി നേതാവ് അധീര് രഞ്ജന് ചൗധരി പറഞ്ഞു. വിഷയം പാര്ലമെന്റില് ഉന്നയിക്കുമെന്നും അദ്ദേഹം വ്യക്തമാക്കി. വിഷയത്തില് കേന്ദ്രസര്ക്കാരിനെതിരെ ഇരുസഭകളിലും കടുത്ത പ്രതിഷേധം ഉയര്ത്താനാണ് പ്രതിപക്ഷ തീരുമാനം.
ചാര സോഫ്റ്റ്വെയര് രാജ്യത്തെ പ്രമുഖരുടെ ഫോണ് ചോര്ത്തിയെന്ന ആരോപണത്തില് പ്രതിപക്ഷം പാര്ലമെന്റില് അടിയന്തര പ്രമേയത്തിന് നോട്ടീസ് നല്കി. ബിനോയ് വിശ്വം എംപിയാണ് രാജ്യസഭയില് നോട്ടീസ് നല്കിയത്. ലോക്സഭയില് എന് കെ പ്രേമചന്ദ്രനും നോട്ടീസ് നല്കി. വിഷയത്തില് സ്വതന്ത്ര അന്വേഷണം വേണമെന്നും അദ്ദേഹം ആവശ്യപ്പെട്ടു.
അതിനിടെ, പെഗാസസ് ഫോണ് ചോര്ത്തല് വിവാദത്തില് കേന്ദ്ര ആഭ്യന്തരമന്ത്രി അമിത് ഷാ പാര്ലമെന്റില് വിശദീകരണം നടത്തണമെന്ന് ബിജെപി നേതാവ് സുബ്രഹ്മണ്യന് സ്വാമി ആവശ്യപ്പെട്ടിട്ടുണ്ട്. ഇസ്രായേല് കമ്പനി വികസിപ്പിച്ച ചാര സോഫ്റ്റ് വെയര് പെഗാസസ് ഉപയോഗിച്ചുള്ള ഫോണ് ചോര്ത്തലില് മോദി സര്ക്കാരിനു ബന്ധമുണ്ടോയെന്ന് അമിത് ഷാ പാര്ലമെന്റില് വ്യക്തമാക്കണം. ഇല്ലെങ്കില് വാട്ടര്ഗേറ്റ് പോലെ സത്യം പുറത്തുവന്നാല് ബിജെപിയെ വേദനിപ്പിക്കുമെന്നും സുബ്രഹ്മണ്യന് സ്വാമി ട്വീറ്റ് ചെയ്തു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ