ന്യൂഡല്‍ഹി: രാജ്യത്തെ പ്രമുഖ പൊതുമേഖല പ്രതിരോധ ഗവേഷണ സ്ഥാപനമായ ഡിആര്‍ഡിഒ വികസിപ്പിച്ച അത്യാധുനിക ടാങ്ക് വേധ മിസൈല്‍ വിജയകരമായി പരീക്ഷിച്ചു. ആത്മനിര്‍ഭര്‍ ഭാരത് പദ്ധതി അനുസരിച്ച് വികസിപ്പിച്ച മിസൈല്‍ കരസേനയ്ക്ക് കരുത്തുപകരും.
കുറഞ്ഞ ഭാരം മാത്രമുള്ള ഈ മിസൈല്‍ മറ്റുള്ളവരുടെ സഹായമില്ലാതെ ഒരാള്‍ക്ക് തന്നെ വഹിച്ചു കൊണ്ടുപോകാവുന്നതാണ് എന്നതാണ്് പ്രത്യേകത. ഇത് വിക്ഷേപിക്കാന്‍ ഉപയോഗിക്കുന്ന സംവിധാനവും സമാനമായ രീതിയില്‍ കൊണ്ടുപോകാവുന്നതാണ്.
മിസൈല്‍ കൃത്യമായി ലക്ഷ്യസ്ഥാനത്ത് പതിച്ചതായി ഡിആര്‍ഡിഒ അറിയിച്ചു. ഇന്‍ഫ്രാറെഡ് സാങ്കേതികവിദ്യ ഇതില്‍ ഉപയോഗിച്ചിട്ടുണ്ട്. ഇതിലൂടെ കൃത്യമായി ശത്രുവിന്റെ നീക്കം തിരിച്ചറിഞ്ഞ് ലക്ഷ്യസ്ഥാനത്തേക്ക് തൊടുക്കാന്‍ സാധിക്കും. ഇതിന് പുറമേ ആധുനിക ഇലക്ട്രോണിക്‌സ് സംവിധാനവും ഇതില്‍ സജ്ജമാക്കിയിട്ടുണ്ടെന്ന് ഡിആര്‍ഡിഒ അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
