കുഞ്ഞിനെ കടിച്ചെടുത്ത് ഓടി സിംഹക്കൂട്ടം; ജീവന്മരണ പോരാട്ടവുമായി അമ്മ കാട്ടുപോത്ത്, പിന്നെ സംഭവിച്ചത് (വീഡിയോ) 

കുഞ്ഞിന്റെ ജീവന്‍ രക്ഷിക്കാന്‍ അമ്മ എന്തും ചെയ്യും. തന്റെ കുഞ്ഞിനെ രക്ഷിക്കാന്‍ സ്വന്തം ജീവന്‍ പോലും പണയം വച്ച് കാട്ടുപോത്ത് കാണിക്കുന്ന ധൈര്യമാണ് സോഷ്യല്‍മീഡിയയില്‍ വൈറലാകുന്നത്. കുഞ്ഞിനെ കടിച്ചെടുത്ത് കൊണ്ട് ഓടിയ സിംഹത്തിന്റെ പിന്നാലെ പാഞ്ഞ് രക്ഷിക്കുന്ന വീഡിയോയാണ് വിസ്മയിപ്പിക്കുന്നത്.

സുശാന്ത നന്ദ ഐഫ്എസ് ആണ് വീഡിയോ പങ്കുവെച്ചത്. കുഞ്ഞിനൊപ്പം കാട്ടുപോത്ത് നടന്നുനീങ്ങുന്നതാണ് വീഡിയോയുടെ തുടക്കത്തില്‍. ചുറ്റിലും സിംഹക്കൂട്ടത്തെയും കാണാം. കാട്ടുപോത്തിന്റെ കുഞ്ഞിനെ ലക്ഷ്യമാക്കിയാണ് സിംഹക്കൂട്ടം കാട്ടുപോത്തിന്റെ പിന്നാലെ കൂടിയത്. ഒരു ഘട്ടത്തില്‍ കുഞ്ഞിനെ കടിച്ചെടുത്ത് ഒരു സിംഹം കാട്ടില്‍ മറയുന്നത് വ്യക്തമാണ്.

എന്നാല്‍ കുഞ്ഞിനെ രക്ഷിക്കാന്‍ രണ്ടും കല്‍പ്പിച്ച് അമ്മ കാട്ടുപോത്ത് മുന്നോട്ടുവരുന്നതാണ് വീഡിയോയുടെ ഏറ്റവും ശ്രദ്ധേയമായ ഭാഗം. കുഞ്ഞിനെ കടിച്ചെടുത്ത് ചെടികള്‍ക്കിടയില്‍ മറിഞ്ഞ സിംഹവുമായി ഏറ്റുമുട്ടി കാട്ടുപോത്ത് കുഞ്ഞിനെ രക്ഷിച്ചു. പിന്നാലെ കാട്ടുപോത്ത് കുഞ്ഞുമായി ഓടി രക്ഷപ്പെടുന്നിടത്താണ് വീഡിയോ അവസാനിക്കുന്നത്.