ഗുവാഹത്തി: അസമില്‍ കന്നുകാലിയെ മോഷ്ടിച്ചു എന്ന സംശയത്തില്‍ 34കാരനെ ആള്‍ക്കൂട്ടം തല്ലിക്കൊന്നു. നഗ്നനാക്കി നാട്ടുകാര്‍ ക്രൂരമായി മര്‍ദ്ദിക്കുന്നത് അറിഞ്ഞ് സ്ഥലത്തെത്തിയ പൊലീസ് യുവാവിനെ രക്ഷപ്പെടുത്തി ആശുപത്രിയില്‍ പ്രവേശിപ്പിച്ചു. ഗുരുതരമായി പരിക്കേറ്റ യുവാവ് ചികിത്സയ്ക്കിടെയാണ് മരിച്ചതെന്ന് പൊലീസ് പറയുന്നു.
അസമിലെ ടിന്‍സുകിയ ജില്ലയിലാണ് സംഭവം.ശരത്ത് മോറാനാണ് ആള്‍ക്കൂട്ട ആക്രമത്തില്‍ മരിച്ചത്. തൊട്ടടുത്ത ഗ്രാമത്തില്‍ കൂട്ടുകാരന്റെ വീട്ടില്‍ രാത്രി തങ്ങുന്നതിനിടെയാണ് ആക്രമണം ഉണ്ടായത്.കന്നുകാലിയെ മോഷ്ടിക്കാന്‍ എത്തിയതാണ് എന്ന സംശയത്തില്‍ നാട്ടുകാര്‍ യുവാവിനെ ആക്രമിക്കുകയായിരുന്നുവെന്നാണ് റിപ്പോര്‍ട്ടുകള്‍.
നാട്ടുകാര്‍ പിടികൂടി നാട്ടുകൂട്ടത്തിന് മുന്നില്‍ കൊണ്ടുപോയി. നാട്ടുകൂട്ടത്തിന്റെ നിര്‍ദേശപ്രകാരം നാട്ടുകാര്‍ നഗ്നനാക്കി യുവാവിനെ ക്രൂരമായി മര്‍ദ്ദിക്കുകയായിരുന്നു. വിവരം ലഭിച്ച് സ്ഥലത്തെത്തിയ പൊലീസ് നാട്ടുകാരുടെ ആക്രമണത്തില്‍ നിന്ന് രക്ഷിച്ച് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഗുരുതരമായി പരിക്കേറ്റ യുവാവിന്റെ ആരോഗ്യനില ചികിത്സയിലിരിക്കേ വഷളാവുകയായിരുന്നുവെന്നാണ് റിപ്പോര്‍ട്ടുകള്‍.
സംഭവവുമായി ബന്ധപ്പെട്ട് 12 പേരെ കസ്റ്റഡിയിലെടുത്തതായി പൊലീസ് അറിയിച്ചു. 34കാരന്റെ ശരീരത്തില്‍ നിരവധി മുറിവേറ്റ പാടുകളുണ്ട്. പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ച ശേഷം ആവശ്യമായ നടപടികള്‍ സ്വീകരിക്കുമെന്ന് പൊലീസ് അറിയിച്ചു. കൊലപാതകം ഉള്‍പ്പെടെ വിവിധ വകുപ്പുകള്‍ ചേര്‍ത്ത് കേസെടുത്ത് അന്വേഷണം ആരംഭിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
