യാത്രക്കാരന്റെ ഉപദ്രവം അതിരുവിട്ടതോടെ ഡൽഹിയിലേക്കുള്ള വിമാനം അടിയന്തരമായി നിലത്തിറക്കി. പാരീസിൽ നിന്ന് ഡൽഹിയിലേക്ക് പുറപ്പെട്ട എയര്‍ ഫ്രാന്‍സ് വിമാനമാണ് ഇന്ത്യക്കാരനായ യാത്രക്കാരനെക്കൊണ്ട് പൊറുതിമുട്ടിയത്. തുടർന്ന് ബള്‍ഗേറിയയിലെ സോഫിയ വിമാനത്താവളത്തിലാണ് വിമാനം എമര്‍ജന്‍സി ലാൻഡിംഗ് നടത്തിയത്.
വെള്ളിയാഴ്‍ച വൈകുന്നേരമായിരുന്നു സംഭവം. വിമാനം പറന്നുയര്‍ന്ന ഉടന്‍ തന്നെ ഇയാൾ അക്രമം തുടങ്ങുകയായിരുന്നുവെന്നാണ് അധികൃതർ പറയുന്നത്. മറ്റ് യാത്രക്കാരോട് വഴക്കിട്ട ഇയാള്‍ വിമാന ജീവനക്കാരെ ഉപദ്രവിക്കുകയും ചെയ്‍തു. കോക്പിറ്റിന്‍റെ വാതിലില്‍ പലതവണ ശക്തിയായി പ്രഹരിച്ചുവെന്നും ബള്‍ഗേറിയന്‍ നാഷണല്‍ ഇന്‍വെസ്റ്റിഗേഷന്‍ ഏജന്‍സി ഉദ്യോഗസ്ഥര്‍ പറഞ്ഞു.
യാത്രക്കാരന്റെ ഉപദ്രവം സഹിക്കാനാവാതെ വന്നപ്പോഴാണ് പൈലറ്റ് സോഫിയ വിമാനത്താവളത്തില്‍ അടിയന്തര ലാൻഡിംഗിന് അനുമതി തേടിയത്. വിമാനത്തില്‍ നിന്ന് സുരക്ഷാ ഉദ്യോഗസ്ഥര്‍ പുറത്തിറക്കിയ ഇയാള്‍ക്കെതിരെ വ്യോമസുരക്ഷ അപകടത്തിലാക്കിയ കുറ്റമാണ് ചുമത്തിയിരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
