ഒരു കോടി രൂപ വിലയുള്ള പാമ്പിൻ വിഷം പിടിച്ചു; സ്ത്രീയടക്കം ആറ് പേർ അറസ്റ്റിൽ  

ഭുവനേശ്വർ: പാമ്പിൻ വിഷം കടത്തിയ ആറം​ഗ സംഘം അറസ്റ്റിൽ. ഒരു ലിറ്റർ പാമ്പിൻ വിഷമാണ്​ സംഘത്തിൽനിന്ന്​ വനം വകുപ്പ്​ അധികൃതർ പിടികൂടിയത്​. അന്തരാഷ്​ട്ര വിപണിയിൽ ഒരു കോടി രൂപ വിലവരുന്നതാണ് ഇത്. ഒഡീഷയിലെ ഭുവനേശ്വറിലാണ്​ സംഭവം. 

‌ഒരു ലിറ്റർ പാമ്പിൻ വിഷം പിടിച്ചെടുത്തെന്നും ഒരു സ്ത്രീ അടക്കമുള്ളവരാണ് അറസ്റ്റിലായിരിക്കുന്നതെന്നും ജില്ല ഫോറസ്റ്റ്​ ഓഫിസർ പറഞ്ഞു. വിഷം വാങ്ങാൻ കരാറുറപ്പിച്ചിരുന്ന മൂന്ന് പേരടക്കമാണ് പിടിയിലായത്. 10ലക്ഷം രൂപക്ക്​ ഡീൽ ഉറപ്പിച്ചാണ്​ പാമ്പിൻ വിഷം എത്തിച്ചുനൽകിയത്​. കുപ്പികളിൽ സൂക്ഷിച്ച നിലയിലായിരുന്നു വിഷം. 

200ഓളം മൂർഖൻ പാമ്പുകളിൽനിന്നു മാത്രമേ ഒരു ലിറ്റർ പാമ്പിൻ വിഷം ലഭിക്കൂവെന്നും വനം വകുപ്പ്​ ഉദ്യോ​ഗസ്ഥർ പറഞ്ഞു. വന്യജീവി സംരക്ഷണ നിയമപ്രകാരം ആറ് പേർക്കെതിരെ കേസെടുത്തെന്നും ഇവരെ കോടതിയിൽ ഹാജരാക്കുമെന്നും അധികൃതർ പറഞ്ഞു.