ന്യൂഡല്ഹി:കോവിഡ് വ്യാപനം രൂക്ഷമായ സാഹചര്യത്തില് രാജ്യത്തെ ഓക്സിജന് ലഭ്യതയും വിതരണവും നിരീക്ഷിക്കാന് ദൗത്യസംഘത്തെ നിയോഗിച്ച് സുപ്രീം കോടതി. 12 അംഗ ദൗത്യ സംഘത്തെയാണ് നിയോഗിച്ചത്. മരുന്നുകളുടെ ലഭ്യത ഉറപ്പാക്കാനും ടാസ്ക് ഫോഴ്സ് ബന്ധപ്പെട്ട അധികൃതര്ക്ക് നിര്ദേശം നല്കും.
ജസ്റ്റിസ് ഡിവൈ ചന്ദ്രചൂഡ്, എംആര് ഷാ എന്നിവരടങ്ങിയ രണ്ടംഗ ബെഞ്ചാണ് ഉത്തരവ് പുറപ്പെടുവിച്ചത്. ടാസ്ക് ഫോഴ്സിലെ എല്ലാ അംഗങ്ങളുമായും ജഡ്ജിമാര് നേരിട്ട് സംസാരിച്ചു. ഡോ. ഭബതോഷ് ബിസ്വാസ്, ഡോ. നരേഷ് ത്രെഹാന് എന്നിവരടങ്ങുന്നതാണ് ടാസ്ക് ഫോഴ്സ്. ക്യാബിനറ്റ് സെക്രട്ടറിയായിരിക്കും കണ്വീനര്.
പ്രതിസന്ധി പരിഹരിക്കുന്നതില് കേന്ദ്രത്തിന് വീഴ്ച പറ്റിയെന്ന നിരന്തര വിമര്ശനങ്ങള്ക്കിടെയാണ് 12 അംഗ ദൗത്യസംഘത്തെ നിയോഗിക്കാന് സുപ്രീംകോടതി തീരുമാനിച്ചത്. ഓക്സിജന് ക്ഷാമത്തില് സുപ്രീംകോടതിയും രാജ്യത്തെ വിവിധ ഹൈക്കോടതികളും കേന്ദ്രസര്ക്കാരിനെ രൂക്ഷ ഭാഷയില് വിമര്ശിച്ചിരുന്നു.
സംസ്ഥാനങ്ങളിലേക്കുള്ള ഓക്സിജന് വിതരണം ഇനി മുതല് ദൗത്യ സംഘം കൂടി വിലയിരുത്തും. ലഭ്യത സംബന്ധിച്ച റിപ്പോര്ട്ടും നിര്ദേശങ്ങളും കേന്ദ്രത്തിനും സുപ്രീംകോടതിക്കും കൈമാറും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ