അഹമ്മദാബാദ്: ഗുജറാത്തില്‍ ഗര്‍ഭിണിയായ നായയെ ക്രൂരമായി മര്‍ദ്ദിക്കുകയും റോഡിലൂടെ വലിച്ചിഴക്കുകയും ചെയ്ത സംഭവത്തില്‍ രണ്ടുപേര്‍ക്കെതിരെ കേസ്. നായയെ ബേസ്‌ബോള്‍ ബാറ്റ് കൊണ്ടാണ് തല്ലിച്ചതച്ചത്. എന്നിട്ടും അരിശംതീരാതെ നായയെ റോഡിലൂടെ വലിച്ചിഴച്ചതായും മൃഗസംരക്ഷണ പ്രവര്‍ത്തകര്‍ നല്‍കിയ പരാതിയില്‍ പറയുന്നു.
വഡോദരയില്‍ സെപ്റ്റംബര്‍ രണ്ടിനാണ് സംഭവം. ദിഗു റാവല്‍, സച്ചിന്‍ റാവല്‍ എന്നിവര്‍ക്കെതിരെയാണ് മൃഗങ്ങള്‍ക്ക് നേരെയുള്ള ക്രൂരത തടയല്‍ നിയമം അനുസരിച്ച് പൊലീസ് നടപടി സ്വീകരിച്ചത്. നിലവില്‍ നായ സുരക്ഷിതയും ആരോഗ്യം വീണ്ടെടുത്തതായും മൃഗസംരക്ഷണ പ്രവര്‍ത്തകര്‍ പറയുന്നു.
വീടിന് മുന്നില്‍ നിന്ന് നായ കുരച്ചതാണ് പ്രകോപനത്തിന് കാരണം. ബേസ്‌ബോള്‍ ബാറ്റുമായി പുറത്തേയ്ക്ക് വന്ന ഇരുവരും ചേര്‍ന്ന് നായയെ ക്രൂരമായി തല്ലിച്ചതയ്ക്കുകയായിരുന്നു. ബേസ്‌ബോള്‍ ബാറ്റ് കണ്ടതോടെ നായ ഓടിരക്ഷപ്പെടാന്‍ ശ്രമിച്ചു. എന്നാല്‍ പിന്തുടര്‍ന്ന് എത്തി ഇരുവരും ചേര്‍ന്ന് തല്ലിയതായാണ് പരാതിയില്‍ പറയുന്നത്. തുടര്‍ന്ന് നായയെ റോഡിലൂടെ വലിച്ചിഴച്ചു എന്നതാണ് കേസ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
