ഭോപ്പാല് : കുടുംബ വഴക്കിനെത്തുടര്ന്ന് യുവാവ് ഭാര്യയുടെ മൂക്ക് കടിച്ചെടുത്തു. മധ്യപ്രദേശിലെ രത്ലം ജില്ലയിലെ അന്ജുമാന് കോളനിയില് ഇന്നലെയായിരുന്നു സംഭവം. ടീന എന്ന യുവതിക്കാണ് ഭര്ത്താവിന്റെ ആക്രമണത്തില് പരിക്കേറ്റത്.
ഗുരുതരമായി പരിക്കേറ്റ ടീനയെ ആശുപത്രിയില് പ്രവേശിപ്പിച്ചു. സംഭവത്തില് ഭര്ത്താവ് ദിനേശിനെ പൊലീസ് അറസ്റ്റ് ചെയ്തു. വഴക്കിനെത്തുടര്ന്ന് രണ്ട് പെണ്മക്കളുടെ മുന്നില് വെച്ചാണ് ദിനേശ് ഭാര്യയുടെ മൂക്ക് കടിച്ചെടുത്തത്.
2008 ലാണ് ദിനേശും ടീനയും വിവാഹിതരായത്. ദിനേശ് തൊഴില് രഹിതനാണെന്നും കടുത്ത മദ്യപാനിയാണെന്നും വിവാഹശേഷമാണ് ടീന അറിഞ്ഞത്. ഇതേച്ചൊല്ലി വഴക്കുണ്ടായിരുന്നു. ദിനേശ് മര്ദ്ദിക്കാറുണ്ടായിരുന്നുവെന്നും ടീന പൊലീസിനോട് പറഞ്ഞു.
ഗാര്ഹിക പീഡനത്തെത്തുടര്ന്ന് ടീന മക്കളുമായി സ്വന്തം വീട്ടിലേക്ക് മടങ്ങി. വിവാഹമോചനത്തിനും ജീവനാംശം ലഭിക്കാനുമായി ദിനേശിനെതിരെ ടീന കേസും നല്കി. ഈ കേസ് പിന്വലിക്കണമെന്ന് ആവശ്യപ്പെട്ടാണ് ദിനേശ് ടീനയുടെ വീട്ടിലെത്തിയത്.
ഇതേച്ചൊല്ലിയുള്ള വഴക്കിനിടെയാണ് ടീനയുടെ മൂക്ക് കടിച്ചെടുത്തത്. തുടര്ന്ന് ഇയാള് രക്ഷപ്പെട്ടു. ആശുപത്രിയില് പ്രവേശിപ്പിച്ച യുവതിയുടെ മൊഴിയുടെ അടിസ്ഥാനത്തില് ദിനേശിനെ പൊലീസ് അറസ്റ്റ് ചെയ്യുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ