ചെന്നൈ: തമിഴ്‌നാട്ടില്‍ കൊലക്കേസ് പ്രതികളെ പൊലീസ് വെടിവച്ചുകൊന്നു. വീടുകളില്‍ അതിക്രമിച്ചു കയറി രണ്ടു പേരെ വെട്ടിക്കൊന്ന കേസിലെ പ്രതികളായ ദിനേശ്, മൊയ്തീന്‍ എന്നിവരാണു പൊലീസ് വെടിവയ്പില്‍ മരിച്ചത്. സ്വയരക്ഷയ്ക്കായാണ് വെടിവച്ചതെന്നാണു പൊലീസിന്റെ വിശദീകരണം.
ഇന്നു പുലര്‍ച്ചെയാണ് സംഭവം. ഇരട്ടക്കൊലക്കേസ് പ്രതികളെ പിടികൂടാന്‍ എത്തിയപ്പോള്‍ ഇവര്‍ നാടന്‍ ബോംബ് എറിഞ്ഞു രക്ഷപ്പെടാന്‍ ശ്രമിച്ചതായി പൊലീസ് പറയുന്നു. ചെങ്കല്‍പ്പേട്ട് തിരുപുലൈവനം കാട്ടിനു സമീപമാണ് പ്രതികള്‍ ഒളിവില്‍ കഴിഞ്ഞിരുന്നത്.
ചെങ്കല്‍പെട്ട് പ്രദേശത്ത് ആട് മോഷ്ടാക്കളുടെ കുത്തേറ്റ് ഒരു പൊലീസുകാരന്‍ നേരത്തേ കൊല്ലപ്പെട്ടിരുന്നു. അതിനു ശേഷമാണ് നൈറ്റ് പട്രോളിങ്ങിനു പോകുന്ന പൊലീസിന് തോക്ക് നല്‍കി തുടങ്ങിയത്. ആവശ്യമെങ്കില്‍ തോക്ക് ഉപയോഗിക്കാനും ഡിജിപി നിര്‍ദേശം നല്‍കിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
