ജയ്പുര്‍: രാജസ്ഥാനില്‍ പ്രായപൂര്‍ത്തിയാവാത്ത, ബധിരയും മൂകയുമായ പെണ്‍കുട്ടിയെ കൂട്ട ബലാത്സംഗം ചെയ്ത് റോഡില്‍ എറിഞ്ഞു. നാട്ടുകാര്‍ കണ്ടെത്തി ആശുപത്രിയില്‍ ആക്കിയ കുട്ടിയുടെ നില ഗുരുതരമായി തുടരുന്നു.
ചൊവ്വാഴ്ച രാത്രിയാണ് നാടിനെ നടുക്കിയ സംഭവം. ചോരയൊലിച്ച് അവശനിലയിലായ കുട്ടിയെ റോഡില്‍ കണ്ടെത്തുകയായിരുന്നു. ഒരു മണിക്കൂറോളം കുട്ടി അവിടെ കിടന്നെന്നാണ് വിവരം. നാട്ടുകാര്‍ അറിയിച്ചത് അനുസരിച്ചാണ് പൊലീസ് എത്തിയത്.
ആദ്യം സമീപത്തെ ആശുപത്രിയില്‍ എത്തിച്ച കുട്ടിയെ പിന്നീട് ജയ്പൂരിലേക്കു മാറ്റി. തീവ്ര പരിചരണ വിഭാഗത്തില്‍ കഴിയുന്ന പെണ്‍കുട്ടി അപകട നില തരണം ചെയ്തിട്ടില്ല.
കുറ്റവാളികളെ കണ്ടെത്താന്‍ പ്രത്യേക സംഘത്തിനു രൂപം നല്‍കിയതായി പൊലീസ് പറഞ്ഞു. ശാസ്ത്രീയ തെളിവുകളുടെ അടിസ്ഥാനത്തിലാണ് അന്വേഷണം മുന്നോട്ടുപോവുന്നത്. സമീപത്തെ ഗ്രാമത്തില്‍നിന്ന് ഇന്നലെ വൈകിട്ട് നാലു മണിയോടെ കാണാതായ കുഞ്ഞാണ് അക്രമത്തിന് ഇരയായത്. മാതാപിതാക്കള്‍ കുട്ടിയെ തിരിച്ചറിഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
