ക്രിസ്മസ് ഓഫർ പ്രഖ്യാപിച്ച് എയർ ഇന്ത്യ; ടിക്കറ്റ് നിരക്കിൽ 30 ശതമാനം വരെ ഇളവ്

മുംബൈ: ക്രിസ്‌മസ് ഓഫറുമായി എയർ ഇന്ത്യ എക്സ്പ്രസ്. വിമാന ടിക്കറ്റുകൾക്ക് 30 ശതമാനം വരെയാണ് കമ്പനി ക്രിസ്‌മസിന് മുന്നോടിയായി ഇളവ് പ്രഖ്യാപിച്ചത്. 'ക്രിസ്മസ് നേരത്തെ എത്തുന്നു' എന്ന ടാഗ് ലൈനോടു കൂടിയാണ് കമ്പനി ഓഫർ പ്രഖ്യാപിച്ചത്. ആഭ്യന്തര, അന്താരാഷ്ട്ര സെക്ടറുകളിൽ വിലക്കുറവ് ലഭ്യമാവുമെന്ന് കമ്പനി അറിയിച്ചിട്ടുണ്ട്

നവംബർ 30 വരെ ഇപ്പോഴത്തെ ഓഫർ പ്രയോജനപ്പെടുത്തി ഈ വർഷം ഡിസംബർ രണ്ടാം തീയ്യതി മുതൽ അടുത്ത വർഷം മേയ് 30 വരെയുള്ള യാത്രകൾക്കായി ടിക്കറ്റുകൾ ബുക്ക് ചെയ്യാമെന്ന് എയർ ഇന്ത്യ അറിയിച്ചു. കമ്പനിയുടെ വെബ്‍സൈറ്റിലും മൊബൈൽ ആപ്ലിക്കേഷനിലും ലോഗിൻ ചെയ്തിട്ടുള്ള ഉപഭോക്താക്കൾക്ക് കൺവീനിയൻസ് ഫീസ് ഒഴിവാക്കുന്നത് ഉൾപ്പെടെയുള്ള അധിക സേവനങ്ങളും എക്സ്പ്രസ് അഹെഡ് കോംപ്ലിമെന്ററി സേവനങ്ങളും ലഭിക്കും.

ബെംഗളുരു - കൊച്ചി, ബെംഗളുരു - കണ്ണൂർ, ബെംഗളുരു - മംഗളുരു, ബെംഗളുരു - തിരുവനന്തപുരം, ചെന്നൈ - തിരുവനന്തപുരം, കണ്ണൂർ - തിരുവനന്തപുരം, ബെംഗളുരു - തിരിച്ചറപ്പള്ളി ഉൾപ്പെടെ നിരവധി റൂട്ടുകളിൽ ആഭ്യന്തര സർവീസുകൾക്ക് നിരക്കിളവ് ലഭിക്കും. ഹൈദരാബാദ്, ലക്നൗ, കൊച്ചി, അമൃത്സർ തുടങ്ങിയ നഗരങ്ങളെ ബന്ധിപ്പിച്ചു കൊണ്ട് അടുത്തിടെ പുതിയ സർവീസുകളും കമ്പനി തുടങ്ങിയിരുന്നു.

ഡിസ്കൗണ്ടുകൾക്ക് പുറമെ ലോയൽറ്റി അംഗങ്ങൾക്കും, വിദ്യാർത്ഥികൾക്കും മുതിർന്ന പൗരന്മാർക്കും, എസ്എംഇകൾക്കും, സായുധ സേനകളിലെ അംഗങ്ങൾക്കും അവരുടെ ആശ്രിതർക്കുമെല്ലാം പ്രത്യേക ഓഫറുകളും വെബ്‍സൈറ്റിലൂടെ ലഭ്യമാവുമെന്ന് എയർ ഇന്ത്യ എക്സ്പ്രസ് അറിയിച്ചിട്ടുണ്ട്. 

ഈ വാർത്ത കൂടി വായിക്കൂ 

സില്‍ക്യാര ടണല്‍ ദുരന്തം; വെര്‍ട്ടിക്കല്‍ ഡ്രില്ലിങ്, എട്ട് മീറ്റര്‍ ദൂരം പിന്നിട്ടതായി റിപ്പോര്‍ട്ട്

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ