LOKSABHA ELECTION 2024
രാഹുൽ ​ഗാന്ധിഫയൽ

ELECTION LIVE: രണ്ടുലക്ഷം കടന്ന് രാഹുല്‍; ലക്ഷത്തിന് മുകളില്‍ കുതിച്ച് അഞ്ചുപേര്‍; കേരളത്തില്‍ യുഡിഎഫ് തരംഗം

വോട്ടെണ്ണലിന്റെ ആദ്യ നാലുമണിക്കൂര്‍ പിന്നിട്ടപ്പോള്‍ ബിജെപി നേതൃത്വം നല്‍കുന്ന എന്‍ഡിഎ 291 സീറ്റുകളില്‍ ലീഡ് ചെയ്യുന്നു

ഓഹരി വിപണിയില്‍ 'ബ്ലഡ് ബാത്ത്'

എക്‌സിറ്റ് പോള്‍ ഫലങ്ങളില്‍ നിന്ന് വ്യത്യസ്തമായ തെരഞ്ഞെടുപ്പ് ഫല സൂചനകളെ തുടര്‍ന്ന് ഓഹരി വിപണിയില്‍ കനത്ത ഇടിവ്. വ്യാപാരത്തിന്റെ ഒരു ഘട്ടത്തില്‍ സെന്‍സെക്‌സ് ആറായിരം പോയിന്റ് ആണ് ഇടിഞ്ഞത്. നിഫ്റ്റിയിലും സമാനമായ ഇടിവ് നേരിട്ടു. നിക്ഷേപകരുടെ 43 ലക്ഷം കോടി രൂപയാണ് വാഷ്ഔട്ടായത്.

രണ്ടുലക്ഷം കടന്ന് രാഹുല്‍; ലക്ഷത്തിന് മുകളില്‍ കുതിച്ച് അഞ്ചുപേര്‍

വോട്ടെണ്ണലിന്റെ ആദ്യ നാലുമണിക്കൂര്‍ പിന്നിട്ടപ്പോള്‍ സംസ്ഥാനത്ത് യുഡിഎഫ് കുതിപ്പ് തുടരുന്നു. 17 മണ്ഡലങ്ങളിലാണ് യുഡിഎഫ് ലീഡ് ചെയ്യുന്നത്. എല്‍ഡിഎഫ് ഒരു സീറ്റില്‍ മാത്രമാണ് മുന്നേറുന്നത്. പ്രതീക്ഷകള്‍ക്ക് വിപരീതമായി എന്‍ഡിഎ രണ്ടിടത്താണ് ലീഡ് ചെയ്യുന്നത്. വയനാട്ടില്‍ ലീഡ് നില രണ്ടു ലക്ഷം കടന്ന് രാഹുല്‍ ഗാന്ധി മുന്നേറുമ്പോള്‍ എറണാകുളത്ത് ഹൈബി ഈഡനും മലപ്പുറത്ത് ഇ ടി മുഹമ്മദ് ബഷീറും പൊന്നാനിയില്‍ അബ്ദുസമദ് സമദാനിയും കോഴിക്കോട് എം കെ രാഘവനും ഇടുക്കിയില്‍ ഡീന്‍ കുര്യാക്കോസും ഒരു ലക്ഷത്തിന് മുകളിലാണ് ലീഡ് ചെയ്യുന്നത്. ഇ ടി മുഹമ്മദ് ബഷീറിന്റെയും ഹൈബി ഈഡന്റെയും ലീഡ് ഒന്നര ലക്ഷം കടന്നിരിക്കുകയാണ്.കണ്ണൂരില്‍ കെ സുധാകരന്‍, വടകരയില്‍ ഷാഫി പറമ്പില്‍, പാലക്കാട് വി കെ ശ്രീകണ്ഠന്‍, കൊല്ലത്ത് എന്‍ കെ പ്രേമചന്ദ്രന്‍, കോട്ടയത്ത് ഫ്രാന്‍സിസ് ജോര്‍ജ്, തൃശൂരില്‍ സുരേഷ് ഗോപി എന്നിവരുടെ ലീഡ് നില 50000ന് മുകളിലാണ്.

എന്‍ഡിഎ വിയര്‍ക്കുന്നു, പോരാട്ട വീര്യവുമായി ഇന്ത്യ സഖ്യം

വോട്ടെണ്ണലിന്റെ ആദ്യ നാലുമണിക്കൂര്‍ പിന്നിട്ടപ്പോള്‍ ബിജെപി നേതൃത്വം നല്‍കുന്ന എന്‍ഡിഎ 291 സീറ്റുകളില്‍ ലീഡ് ചെയ്യുന്നു. പ്രതീക്ഷകള്‍ക്ക് വിപരീതമായി കോണ്‍ഗ്രസ് നേതൃത്വം നല്‍കുന്ന ഇന്ത്യ സഖ്യം 231 മണ്ഡലങ്ങളിലാണ് മുന്നേറുന്നത്. ഉറച്ച സംസ്ഥാനമാണെന്ന് കരുതിയ യുപിയില്‍ നിന്നാണ് ബിജെപിക്ക് ഏറ്റവുമധികം തിരിച്ചടി നേരിട്ടത്. എസ്പി, കോണ്‍ഗ്രസ് സഖ്യം വലിയ മുന്നേറ്റമാണ് യുപിയില്‍ കാഴ്ച വെച്ചത്. കഴിഞ്ഞ തവണ ഒറ്റയ്ക്ക് 303 സീറ്റുകള്‍ നേടിയ ബിജെപി ഇത്തവണ 238 സീറ്റുകളില്‍ മാത്രമാണ് ലീഡ് ചെയ്യുന്നത്. കോണ്‍ഗ്രസ് നില മെച്ചപ്പെടുത്തുന്നതാണ് കണ്ടത്. നൂറിന് അടുത്ത് സീറ്റുകളിലാണ് കോണ്‍ഗ്രസ് മുന്നേറുന്നത്.

ഒറ്റയടിക്ക് വാഷ്ഔട്ടായത് 26 ലക്ഷം കോടി രൂപ; ഓഹരി വിപണിയില്‍ കനത്ത ഇടിവ്

എക്‌സിറ്റ് പോള്‍ ഫലങ്ങളില്‍ നിന്ന് വ്യത്യസ്തമായി ബിജെപിക്ക് തിരിച്ചടി ലഭിച്ചത് ഓഹരി വിപണിയില്‍ പ്രതിഫലിച്ചു. എക്‌സിറ്റ് പോള്‍ ഫലങ്ങളില്‍ പ്രതീക്ഷയര്‍പ്പിച്ച് ഇന്നലെ ശക്തമായ മുന്നേറ്റം കാഴ്ചവെച്ച ഓഹരി വിപണിയില്‍ ഇന്നലെ നേടിയതിന്റെ ഇരട്ടി ഇന്ന് നഷ്ടപ്പെടുന്നതാണ് കണ്ടത്. ഇന്നലെ റെക്കോര്‍ഡുകള്‍ ഭേദിച്ച് രണ്ടായിരത്തില്‍പ്പരം പോയിന്റ് മുന്നേറിയ സെന്‍സെക്‌സ് ഇന്ന് നാലായിരം പോയിന്റാണ് ഇടിഞ്ഞത്. നിഫ്റ്റിയിലും സമാനമായ ഇടിവ് നേരിട്ടു. സെന്‍സെക്‌സ് 5.35 ശതമാനം ഇടിഞ്ഞ് 72000ലേക്ക് എത്തി. നിഫ്റ്റി ആയിരത്തില്‍പ്പരം പോയിന്റാണ് ഇടിഞ്ഞത്. 22,000 പോയിന്റിനോടനുബന്ധിച്ചാണ് നിഫ്റ്റിയില്‍ വ്യാപാരം നടക്കുന്നത്.

300 കടന്ന് എന്‍ഡിഎ

ലോക്‌സഭ തെരഞ്ഞെടുപ്പ് വോട്ടെണ്ണലിന്റെ ആദ്യ മൂന്ന് മണിക്കൂര്‍ പിന്നിട്ടപ്പോള്‍ ബിജെപിയുടെ നേതൃത്വത്തിലുള്ള എന്‍ഡിഎ 300ലേറെ മണ്ഡലങ്ങളില്‍ ലീഡ് ചെയ്യുന്നു. എന്നാല്‍ പ്രതീക്ഷിച്ചതില്‍ നിന്ന് വ്യത്യസതമായി മുന്‍ തെരഞ്ഞെടുപ്പിനെ അപേക്ഷിച്ച് ബിജെപി 59 സീറ്റുകള്‍ക്ക് പിന്നിലാണ്. ഇത്തവണ 244 സീറ്റുകളിലാണ് ബിജെപി മുന്നിട്ടുനില്‍ക്കുന്നത്. കഴിഞ്ഞ തവണ ബിജെപിക്ക് മാത്രം 303 സീറ്റുകള്‍ ലഭിച്ചിരുന്നു. എക്‌സിറ്റ് പോള്‍ ഫലങ്ങളെ തള്ളിക്കൊണ്ട് വന്‍ മുന്നേറ്റമാണ് ഇന്ത്യ സഖ്യം കാഴ്ചവെയ്ക്കുന്നത്. 221 ഇടത്താണ് ഇന്ത്യ സഖ്യം ലീഡ് ചെയ്യുന്നത്. ഇതില്‍ കോണ്‍ഗ്രസ് നില മെച്ചപ്പെടുത്തുകയാണ്. നൂറിന് അടുത്ത് സീറ്റുകളിലാണ് കോണ്‍ഗ്രസ് ലീഡ് ചെയ്യുന്നത്. ബിജെപി നേതൃത്വത്തെ ഞെട്ടിച്ച് യുപിയില്‍ എസ്പി 28ലേറെ സീറ്റുകളിലാണ് ലീഡ് ചെയ്യുന്നത്.

യുഡിഎഫ് തേരോട്ടം, 17 ഇടത്ത് ലീഡ്, എന്‍ഡിഎ രണ്ടിടത്ത് 

വോട്ടെണ്ണലിന്റെ ആദ്യ രണ്ടര മണിക്കൂർ പിന്നിട്ടപ്പോൾ സംസ്ഥാനത്ത് യുഡിഎഫ് തേരോട്ടം. 20 മണ്ഡലങ്ങളിലേക്ക് നടന്ന തെരഞ്ഞെടുപ്പിൽ 17 ഇടത്താണ് യുഡിഎഫ് മുന്നിട്ട് നിൽക്കുന്നത്. രണ്ടിടത്ത് മുന്നേറി എൻഡിഎ രാഷ്ട്രീയ കേന്ദ്രങ്ങളെ ഞെട്ടിച്ചു. ഒരിടത്ത് മാത്രമാണ് ഭരണകക്ഷിയായ എൽഡിഎഫ് മുന്നിട്ട് നിൽക്കുന്നത്. മന്ത്രി രാധാകൃഷ്ണൻ മത്സരിക്കുന്ന ആലത്തൂരിൽ മാത്രമാണ് എൽഡിഎഫ് മുന്നേറുന്നത്. തൃശൂരിൽ ബിജെപി സ്ഥാനാർഥി സുരേഷ് ​ഗോപിയുടെ ലീഡ് 25000 കടന്നു. തിരുവനന്തപുരത്ത് രാജീവ് ചന്ദ്രശേഖറിന്റെ ലീഡ് രണ്ടായിരത്തിന് മുകളിലാണ്.വയനാട്ടിലാണ് ഏറ്റവും ഉയർന്ന ലീഡ്. കോൺ​ഗ്രസ് സ്ഥാനാർഥി രാഹുൽ ​ഗാന്ധി 80000 കടന്നാണ് കുതിക്കുന്നത്. ഇടുക്കി, എറണാകുളം, മലപ്പുറം മണ്ഡലങ്ങളിൽ ലീഡ് നില 50000 കടന്നു. പൊന്നാനിയിൽ യുഡിഎഫ് സ്ഥാനാർഥി അബ്ദുസമദ് സമദാനി 40000 വോട്ടുകൾക്ക് മുന്നിലാണ്.