പറക്കാന്‍ സജ്ജമായി കിടക്കുന്ന എമറൈറ്റ്‌സ് വിമാനം ബ്ലിങ് 777 കണ്ട് കണ്ണ് തള്ളിയിരിക്കുകയാണ് ഇന്റര്‍നെറ്റ് ലോകം. സംഗതി ഇഷ്ടപ്പെട്ടെങ്കിലും സംഭവം അങ്ങ് വിശ്വസിക്കണോ വേണ്ടയോ എന്ന ആശയക്കുഴപ്പത്തിലാണ് പലരും. എമറൈറ്റ്‌സ് എയര്‍ലൈന്റെ ഔദ്യോഗിക ട്വിറ്റര്‍ പേജിലൂടെ പങ്കുവച്ചതുകൊണ്ടുതന്നെ കൂടുതല്‍ പേരും സംഭവം സത്യമാണെന്ന ചിന്തയിലാണ്. എന്നാല്‍ വജ്രക്കല്ലുകള്‍ കൊണ്ട് മൂടിയ ഈ വിമാനം വെറും ഒരു ചിത്രം മാത്രമാണെന്നതാണ് യാഥാര്‍ത്ഥ്യം.
ചിത്രകാരിയായ സാറാ ഷക്കീലിന്റെ സൃഷ്ടിയാണ് ഇത്. അഞ്ച് ലക്ഷത്തോളം ഫോളോവേഴ്‌സുള്ള സാറയുടെ ഇന്‍സ്റ്റഗ്രാം പേജിലാണ് ആദ്യം ചിത്രം പ്രത്യക്ഷപ്പെട്ടത്. ഡിസംബര്‍ നാലാം തിയതി പങ്കുവച്ച ചിത്രം 54,000ത്തോളം ലൈക്കുകള്‍ വാങ്ങിക്കൂട്ടിയിരുന്നു. പിന്നീടാണ് എമിറേറ്റ്‌സിന്റെ പേജില്‍ ചിത്രം പ്രത്യക്ഷപ്പെട്ടത്. 12,000ത്തോളെ ലൈക്കുകള്‍ നേടിയ ട്വീറ്റ് 4,000ത്തോളം പേരാണ് റീട്വീറ്റ് ചെയ്തത്.
ഇത് സത്യമാണോ, ഈ വിമാനം ശരിക്കും പറക്കുമോ തുടങ്ങിയ ചോദ്യങ്ങള്‍ മുതല്‍ യാത്രക്കാര്‍ക്ക് സൗകര്യപ്രദമായ ഇരിപ്പിടങ്ങള്‍ ഒരുക്കുക എന്ന ഉപദേശം വരെ എമിറേറ്റ്‌സിന്റെ ട്വീറ്റിന് മറുപടിയായി ലഭിച്ചു. വിമാനത്തിന്റെ ബാഹ്യ ഭംഗിയെ വര്‍ണ്ണിച്ചുള്ള കമന്റുകളും നിരവധിയാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
