ഇന്ത്യയിൽ ഏറ്റവും വേഗത കൂടിയ 4ജി സേവനം ലഭ്യമാക്കുന്ന ടെലികോം സേവനദാതാവായി വീണ്ടും റിലയൻസ് ജിയോ. ടെലികോം റഗുലേറ്ററി അതോറിട്ടി (ട്രായ്)യുടെ മാർച്ച് മാസത്തിലെ കണക്കുകൾ അനുസരിച്ചാണ് ജിയോ വീണ്ടും ഒന്നാമതെത്തിയത്. 22.2 എംബിപിഎസ് ശരാശരി വേഗതയുമായാണ് ജിയോ മുന്നിലെത്തിയത്. കഴിഞ്ഞ വർഷവും 4ജി വേഗതയിൽ ജിയോ തന്നെയായിരുന്നു ഒന്നാമത്.
9.3 എംബിപിഎസാണ് എയർടെല്ലിന്റെ 4ജി സ്പീഡ്. വോഡഫോൺ 6.8 എംബിപിഎസും ഐഡിയ 5.6 എംബിപിഎസ് വേഗതയുമാണ് ലഭ്യമാക്കുന്നത്.
എന്നാൽ 3ജി വേഗതയിൽ വോഡഫോണും ബിഎസ്എൻഎല്ലും ഐഡിയയുമാണ് മുന്നിലുള്ളത്. 2.8 എംബിപിഎസ് വേഗതയുമായി വോഡഫോണാണ് ആദ്യം. 2.5 എംബിപിഎസ് വേഗതയുമായി ബിഎസ്എന്‍എല്ലും ഐഡിയയും 2.4 എംബിപിഎസ് വേഗതയുമായി എയർടെല്ലും പിന്നാലെയുണ്ട്.
4ജി അപ്‌ലോഡിങ് സ്പീഡിൽ വോഡഫോണാണ് മുന്നിൽ. 6.0 എംബിപിഎസ് ആണ് വോഡഫോണിന്റെ അപ്‌ലോഡിങ് സ്പീഡ്. ഐഡിയയെ പിന്നിലാക്കിയാണ് ഈ മാസം വോഡഫോൺ ഒന്നാമതെത്തിയത്. 5.5 എംബിപിഎസ് ആണ് ഐഡിയയുടെ അപ്‌ലോഡിങ് വേഗം. 4.6 എംബിപിഎസ് ആണ് ജിയോയുടെ അപ്‌ലോഡിങ് വേഗം. 3.6 എംബിപിഎസ് സ്പീഡുമായി എയർടെൽ പിന്നിലാണ്. മൈസ്പീഡ് ആപ്പ് വഴി ഉപഭോക്താക്കളിൽ നിന്നു ട്രായ‌ിക്കു ലഭിച്ച റിപ്പോർട്ടുകൾ കണക്കിലെടുത്താണ് ഈ നിർണ്ണയം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
