ന്യൂഡല്‍ഹി: പുതുവര്‍ഷത്തില്‍ ഉപഭോക്താക്കളെ ആകര്‍ഷിക്കാന്‍ ഗംഭീര ഓഫറുമായി പ്രമുഖ ടെലികോം കമ്പനിയായ റിലയന്‍സ് ജിയോ. '2020 ഹാപ്പി ന്യൂ ഇയര്‍ ഓഫര്‍' എന്ന പേരില്‍ പുറത്തിറക്കിയ പുതിയ പ്ലാന്‍ അനുസരിച്ച് വര്‍ഷം മുഴുവന്‍ പരിധിയില്ലാത്ത സേവനങ്ങളാണ് ഉപഭോക്താവിന് ലഭ്യമാക്കുക. 2020 രൂപയ്ക്ക് റീച്ചാര്‍ജ് ചെയ്താല്‍ ഈ സേവനം പ്രയോജനപ്പെടുത്താമെന്ന് കമ്പനി പ്രഖ്യാപിച്ചു.
ചൊവ്വാഴ്ച മുതല്‍ ഈ പ്ലാന്‍ തെരഞ്ഞെടുക്കാവുന്നതാണ്. സ്മാര്‍ട്ട്‌ഫോണ്‍, ജിയോ ഉപയോക്താക്കള്‍ എന്നിങ്ങനെ രണ്ടായി തിരിച്ചാണ് പുതിയ പ്ലാന്‍ പ്രഖ്യാപിച്ചിരിക്കുന്നത്. സ്മാര്‍ട്ട് ഫോണ്‍ ഉപയോഗിക്കുന്നവര്‍ക്ക് പരിധിയില്ലാതെയുളള വോയ്‌സ്‌കോളും 1.5ജിബി ഡേറ്റയും എസ്എംഎസ് സേവനവുമാണ് ലഭിക്കുക. ഒരു വര്‍ഷമാണ് ഇതിന്റെ കാലാവധിയെന്ന് കമ്പനി അറിയിച്ചു.
2020 രൂപ അടച്ച് ജിയോ ഫോണും മറ്റു സേവനങ്ങളും പ്രയോജനപ്പെടുത്താന്‍ കഴിയുന്നതാണ് മറ്റൊരു രീതി. പരിധിയില്ലാത്ത വോയ്‌സ് കോള്‍ ഇതിന്റെയും പ്രത്യേകതയാണ്. എന്നാല്‍ പ്രതിദിനം 0.5 ജിബി ഡേറ്റ മാത്രമേ ലഭിക്കു. എസ്എംഎസ് സേവനമാണ് മറ്റൊരു സവിശേഷത. ഒരു വര്‍ഷം വരെയാണ് ഇതിന്റെയും കാലാവധി. ഇതര നെറ്റ്‌വര്‍ക്കുകളിലേക്ക് വിളിക്കുമ്പോള്‍ വോയ്‌സ് കോളിന് പരിധി നിശ്ചയിക്കുമെന്നും കമ്പനി വ്യക്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
