ന്യൂഡല്‍ഹി:ചാനല്‍ നമ്പറുകള്‍ ഇടയ്ക്കിടെ മാറ്റുന്നത് പ്രേക്ഷകര്‍ക്ക് ബുദ്ധിമുട്ടുകള്‍ സൃഷ്ടിക്കാറുണ്ട്. ഇഷ്ടമുളള ചാനല്‍ എവിടെ എന്ന് പരതേണ്ടി വരുന്ന അവസ്ഥ പലപ്പോഴും പരാതികള്‍ക്കും കാരണമാകാറുണ്ട്. ഇതിന് പരിഹാരം കാണാന്‍ നടപടി സ്വീകരിച്ചിരിക്കുകയാണ് ടെലികോം നിയന്ത്രണസംവിധാനമായ ട്രായ്.
ഒരേ സ്വഭാവമുളള ചാനലുകള്‍ ഒരുമിച്ച് ലഭിക്കുന്നുണ്ടെന്നും ഒരു ചാനല്‍ കാലാകാലങ്ങളായി ഒരേ നമ്പറില്‍ തന്നെ കിട്ടുന്നുണ്ടെന്നും ഉറപ്പാക്കാന്‍ ആവശ്യമായ നടപടികള്‍ സ്വീകരിക്കാന്‍ കേബിള്‍ ടിവി ചാനല്‍ വിതരണക്കാര്‍ക്കും ഡിടിഎച്ച് സേവനദാതാക്കള്‍ക്കും ട്രായ് നിര്‍ദേശം നല്‍കി. ഈ രംഗത്ത് ട്രായ് നടപ്പിലാക്കിയ പരിഷ്‌കരണനടപടികളുടെ ഭാഗമായാണ് പുതിയ നടപടി. ഇത് ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് ട്രായിയുടെ ഉത്തരവില്‍ പറയുന്നു.
നിലവില്‍ ചില ചാനലുകള്‍ പലയിടങ്ങളിലായി പ്രത്യക്ഷപ്പെടുന്നത് പ്രേക്ഷകര്‍ക്ക് ബുദ്ധിമുട്ട് സൃഷ്ടിക്കുന്നുണ്ട്. ഇതുസംബന്ധിച്ച് നിരവധി പരാതികള്‍ ട്രായിക്ക് ലഭിച്ചിട്ടുണ്ട്. ഇതിന്റെ അടിസ്ഥാനത്തിലാണ് നടപടി. ഒരേ സ്വഭാവമുളള ചാനലുകള്‍ ഒരു തലക്കെട്ടിന്റെ താഴെ ക്രമീകരിക്കണമെന്ന് ട്രായിയുടെ മാര്‍ഗനിര്‍ദേശം നിലനില്‍ക്കുന്നുണ്ട്. ഉദാഹരണമായി എല്ലാ ന്യൂസ് ചാനലുകള്‍ ന്യൂസ് ആന്റ് കറന്റ് അഫയേഴ്‌സിന്റെ കീഴില്‍ ക്രമീകരിക്കണമെന്നതാണ് നിര്‍ദേശം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
