കൊച്ചി: പ്രതിദിനം റെക്കോര്ഡുകള് തിരുത്തി കുറിച്ച് മുന്നേറുന്ന സ്വര്ണവില വീണ്ടും കൂടി. ഇന്ന് രണ്ട് തവണകളായി പവന് 920 രൂപയാണ് വര്ധിച്ചത്. രാജ്യാന്തര വിപണിയില് സ്വര്ണത്തിന്റെ ഡിമാന്ഡ് വര്ധിച്ചതാണ് കേരളത്തില് പ്രതിഫലിച്ചത്. രാജ്യാന്തര വിപണിയില് സ്വര്ണവില ട്രോയ് ഔണ്സിന് 2000 രൂപ കടന്നിരിക്കുകയാണ്.
രാവിലെ പവന് 520 വര്ധിച്ച സ്വര്ണവില മണിക്കൂറുകളുടെ വ്യത്യാസത്തില് വീണ്ടും കുതിക്കുകയായിരുന്നു. 400 രൂപ കൂടി വര്ധിച്ചതോടെ ഒരു പവന് സ്വര്ണം വാങ്ങാന് 41000ല്പ്പരം രൂപ നല്കേണ്ട സ്ഥിതിയാണ്. 41200 രൂപയായാണ് സ്വര്ണവില ഉയര്ന്നത്. ഗ്രാമിന്റെ വിലയിലും വര്ധനയുണ്ട്. 50 രൂപ കൂടി വര്ധിച്ചതോടെ ഒരു ഗ്രാം സ്വര്ണത്തിന്റെ വില 5150 രൂപയായി ഉയര്ന്നു. തുടര്ച്ചയായ രണ്ട് ദിവസം മാറ്റമില്ലാതെ തുടര്ന്ന സ്വര്ണവില കഴിഞ്ഞദിവസം പവന് 120 രൂപ വര്ധിച്ചിരുന്നു. പിന്നാലെയാണ് ഇന്നത്തെ തുടര്ച്ചയായ വിലവര്ധന. ജൂലൈ 31നാണ് 40,000 എന്ന പുതിയ ഉയരം സ്വര്ണവില കുറിച്ചത്. ഓഗസ്റ്റ് ഒന്നിന് 160 രൂപ വര്ധിച്ച സ്വര്ണവില പിന്നീടുളള രണ്ടു ദിവസം മാറ്റമില്ലാതെ തുടരുകയായിരുന്നു.
കഴിഞ്ഞ മാസത്തിന്റെ തുടക്കത്തില് ഒരു പവന് സ്വര്ണത്തിന്റെ വില 36160 രൂപയായിരുന്നു. ഒരു ഘട്ടത്തില് 35800 രൂപയിലേക്ക് താഴ്ന്നിരുന്നു. തുടര്ന്ന് പടിപടിയായി ഉയര്ന്നാണ് പുതിയ ഉയരം കുറിച്ചത്. ഒരു മാസത്തിനിടെ 5500 രൂപയാണ് ഉയര്ന്നത്.കോവിഡ് വ്യാപനത്തിന്റെ പശ്ചാത്തലത്തില് സുരക്ഷിത നിക്ഷേപമെന്ന നിലയില് സ്വര്ണത്തിലേക്ക് നിക്ഷേപകര് ഒഴുകി എത്തുകയാണ്. അതാണ് സ്വര്ണ വില ഗണ്യമായി ഉയരാന് കാരണം.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ