മൊബൈല്‍ നമ്പര്‍ അക്കൗണ്ടുമായി ബന്ധിപ്പിച്ചോ?, ഉടന്‍ ശാഖകളെ സമീപിക്കുക, പണം പിന്‍വലിക്കാനാകില്ല; എസ്ബിഐയുടെ മുന്നറിയിപ്പ്
By സമകാലിക മലയാളം ഡെസ്‌ക്‌ | Published: 04th January 2020 01:42 PM |
Last Updated: 04th January 2020 01:42 PM | A+A A- |
കൊച്ചി: എടിഎമ്മില്‍ നിന്നുള്ള പണം പിന്‍വലിക്കല്‍ കൂടുതല്‍ സുരക്ഷിതമാക്കാന്‍ വണ്‍ ടൈം പാസ് വേഡ് സംവിധാനം ജനുവരി ഒന്നുമുതല്‍ എസ്ബിഐ ഏര്‍പ്പെടുത്തിയിട്ടുണ്ട്. രാജ്യത്തെ എസ്ബിഐ എടിഎമ്മുകളില്‍ നിന്ന് പണം പിന്‍വലിക്കാന്‍ മൊബൈല്‍ഫോണില്‍ വരുന്ന ഒടിപി നമ്പര്‍ അടിച്ചുകൊടുത്താല്‍ മാത്രമേ പണം പിന്‍വലിക്കാന്‍ സാധിക്കുകയുളളൂ. രാത്രി എട്ടു മുതല്‍ രാവിലെ എട്ടുവരെ 10,000 രൂപയ്ക്ക് മുകളിലുള്ള ഇടപാടുകള്‍ക്കാണ് ഒടിപി സംവിധാനം ഏര്‍പ്പെടുത്തിയത്.
എടിഎം മെഷീനില്‍ കാര്‍ഡ് ഇട്ടാല്‍ ബാങ്കില്‍ രജിസ്റ്റര് ചെയ്തിട്ടുള്ള മൊബൈല്‍ നമ്പറില്‍ ഒടിപി വരും. സ്‌ക്രീനില്‍ തെളിയുന്ന ഭാഗത്ത് ഒടിപി നമ്പര്‍ നല്‍കിയാല്‍ പണം പിന്‍വലിക്കാം. ഇത്തരത്തിലാണ് സുരക്ഷാ ക്രമീകരണം ഒരുക്കിയിരിക്കുന്നത്.എന്നാല്‍ ബാങ്കില്‍ മൊബൈല്‍ നമ്പര്‍ നല്‍കാത്തവര്‍ക്ക് പണം പിന്‍വലിക്കാന്‍ കഴിയില്ലെന്ന് എസ്ബിഐ മുന്നറിയിപ്പ് നല്‍കുന്നു. അതിനാല്‍ ഉടന്‍ തന്നെ മൊബൈല്‍ നമ്പര്‍ അക്കൗണ്ടുമായി ബന്ധിപ്പിക്കാന്‍ എസ്ബിഐ അക്കൗണ്ടുടമകളോട് നിര്‍ദേശിക്കുന്നു. ഇതിനായി അതത് ബാങ്ക് ശാഖകളെ സമീപിക്കാനാണ് എസ്ബിഐയുടെ മുന്നറിയിപ്പില്‍ പറയുന്നത്.
