അഫ്ഗാന്റെ 'കുഞ്ഞു മെസി' നാടുവിട്ടു; ഫുട്‌ബോളും ജഴ്‌സിയുമെടുക്കാതെ പലായനം...
By സമകാലികമലയാളം ഡെസ്‌ക്‌ | Published: 07th December 2018 06:08 AM |
Last Updated: 07th December 2018 06:08 AM | A+A A- |
ഫുട്‌ബോള്‍ ദൈവത്തിന്റെയും ലോകത്തിന്റെയും ഹൃദയം കീഴടക്കിയ അഫ്ഗാനിസ്ഥാനിലെ കുഞ്ഞു മെസി മുര്‍ത്താസ അഹമ്മദി എന്ന ബാലന്‍ നാടുവിട്ടു. താലിബാന്‍ ഭീഷണിയെത്തുടര്‍ന്നാണ് മുര്‍ത്താസയും കുടുംബവും ഗസ്‌നിലെ വീടുവിട്ടതെന്ന് വാര്‍ത്താ ഏജന്‍സിയായ എഎഫ്പി റിപ്പോര്‍ട്ട് ചെയ്യുന്നു.
പ്ലാസ്റ്റിക് കവറില്‍ നീല കളര്‍ അടിച്ചുണ്ടാക്കിയ ജേഴ്‌സിയില്‍ മെസി എന്ന് എഴുതിയ മുജഴ്‌സിയുമായി നില്‍ക്കുന്ന മുര്‍ത്താസയുടെ ചിത്ര ഏറെ ശ്രദ്ധിക്കപ്പെട്ടിരുന്നു. പിന്നീട് മെസി തന്നെ മുര്‍ത്താസയെയും കുടുംബത്തെയും കാബൂളിലേക്കു ക്ഷണിച്ചു. യുണിസെഫ് വഴി ഒരു പന്തും ജഴ്‌സിയും സമ്മാനമായി നല്‍കി. പിന്നീട് ഖത്തറില്‍വെച്ച് മുര്‍ത്താസയെ മെസി നേരില്‍ കാണുകയും ചെയ്തു. ഖത്തറില്‍ ബാഴ്‌സലോണയുടെ സൗഹൃദ മത്സരത്തിനായി മെസിയുടെ കൈപിടിച്ച് മുര്‍ത്താസയും കളത്തിലിറങ്ങിയിരുന്നു.
താലിബാന്‍ ആക്രണമണം രൂക്ഷമായതോടെയാണ് ഗ്രാമവാസികള്‍ ഒഴിഞ്ഞുപോയത്. എന്നാല്‍ മുര്‍ത്താസക്ക് മെസി സമ്മാനിച്ച ഫുട്‌ബോളും ജേഴ്‌സിയും ഇവര്‍ക്ക് കൂടെകൊണ്ടുപോകാനായില്ലെന്നാണ് റിപ്പോര്‍ട്ട്. വെടിയൊച്ച കേട്ടതോടെ രാത്രി തന്നെ കൈയില്‍ കിട്ടിയ സാധനങ്ങളുമെടുത്ത് വീടുവിട്ടിറങ്ങുകയായിരുന്നുവെന്ന് മുര്‍ത്താസയുടെ മാതാവ് ഷെഫീഖ വെളിപ്പെടുത്തി.
