റെയില്‍വേ പാളത്തിനും ലെവല്‍ ക്രോസിനും ഇടയില്‍പ്പെട്ട ഒരു കാറിലെ യാത്രക്കാര്‍ രക്ഷപ്പെടുന്ന വീഡിയോ ആണ് ഇപ്പോള്‍ സമൂഹമാധ്യമങ്ങളില്‍ വൈറലാകുന്നത്. എവിടെയാണ് അപകടം സംഭവിച്ചതെന്നൊന്നും വ്യക്തമല്ല. പക്ഷേ അല്‍പം പോലും കാത്തുനില്‍ക്കാന്‍ ക്ഷമയില്ലാത്തവര്‍ക്കു ഒരു വലിയ പാഠമാണ് ഇതില്‍ ചിത്രീകരിക്കപ്പെട്ടിരിക്കുന്ന ദൃശ്യങ്ങള്‍.
ഗേറ്റിനും പാളത്തിനുമിടയില്‍ കുടുങ്ങിയ വാഹനം നീക്കാന്‍ ശ്രമിക്കുന്നതും പരാജയപ്പെടുന്നതും വീഡിയോയില്‍ വ്യക്തമാണ്. ദൂരെ നിന്നും പാഞ്ഞെത്തുന്ന ട്രെയിനിന്റെ പേടിപ്പെടുത്തുന്ന ഹോണും പശ്ചാതലത്തില്‍ കേള്‍ക്കാം. ഹ്യുണ്ടായി ക്രേറ്റയാണ് കുടുങ്ങിയത്.
വേഗത്തിലെത്തുന്ന ട്രെയിന്‍ ഇടിക്കാതിരിക്കാന്‍ വളരെ പണിപ്പെട്ടാണ് ഡ്രൈവര്‍ വാഹനം ഒതുക്കുന്നത്. ട്രെയിന്‍ വരുന്നതിനു മുന്‍പ് അപ്പുറം കടക്കാനുള്ള വെപ്രാളത്തിലാകാം ഈ അബദ്ധം സംഭവിച്ചത് എന്നാണ് സൂചന.
ഒടുവില്‍ റെയില്‍വേ ഗേറ്റിന് സമാന്തരമായി കാര്‍ ചേര്‍ത്തിട്ടാണ് യാത്രികര്‍ രക്ഷപ്പെട്ടത്. റെയില്‍വേ ലവല്‍ ക്രോസുകളില്‍ അക്ഷമരാകുന്നവര്‍ക്കുള്ള മറുപടിയാണ് ഈ വീഡിയോ എന്ന ഓര്‍മ്മപ്പെടുത്തലോടെയാണ് ദൃശ്യങ്ങള്‍ പ്രചരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
