അച്ഛന്‍ മരിച്ചു കഴിഞ്ഞു അങ്കിള്‍ വരുമ്പോ എനിക്ക് എന്തോ ഇഷ്ടകേടായിരുന്നു; അമ്മ അച്ഛനെ മറക്കുന്നത് സഹിച്ചില്ല; അതിന് സമ്മതിച്ചില്ല; കുറിപ്പ്

അമ്മ എന്റെ അച്ഛനെ മറക്കുന്നത് പോലെ തോന്നി..അതെനിക്ക് സഹിക്കാന്‍ വയ്യായിരുന്നു
അച്ഛന്‍ മരിച്ചു കഴിഞ്ഞു അങ്കിള്‍ വരുമ്പോ എനിക്ക് എന്തോ ഇഷ്ടകേടായിരുന്നു; അമ്മ അച്ഛനെ മറക്കുന്നത് സഹിച്ചില്ല; അതിന് സമ്മതിച്ചില്ല; കുറിപ്പ്

പങ്കാളികളില്‍ ഒരാള്‍ അകാലത്തില്‍ മരിച്ചാല്‍ പുനര്‍വിവാഹത്തെ കുറിച്ചു ചിന്തിക്കുന്നവര്‍ അപൂര്‍വമാണ്. മറ്റൊരു വിവാഹം വേണമെന്ന് ആഗ്രഹിക്കുന്നവരാകട്ടെ മക്കള്‍ക്ക് ഇഷ്ടക്കേടാകുമോയെന്ന് കരുതി വേണ്ടെന്ന് വെക്കുകയും ചെയ്യും. അമ്മ പുനര്‍വിവാഹം കഴിക്കാന്‍ ആഗ്രഹിച്ചപ്പോള്‍ ചെറിയപ്രായത്തില്‍ അതിന് സമ്മതിക്കാതിരുന്ന ഒരു മകളെക്കുറിച്ച് എഴുതിയിരിക്കുകയാണ് സൈക്കോളജിസ്റ്റായ കല മോഹന്‍. വര്‍ഷങ്ങള്‍ക്ക് ശേഷം ആ തീരുമാനത്തില്‍ മകള്‍ക്ക് തോന്നിയ കുറ്റബോധത്തെക്കുറിച്ചും കല എഴുതിയിരിക്കുന്നു. കുറിപ്പ് ഇങ്ങനെ:

എനിക്ക് ഇപ്പൊ നല്ല കുറ്റബോധം ഉണ്ട്, അമ്മയോട് അന്ന് അങ്ങനെ പെരുമാറി എന്നോര്‍ത്ത്. 

അവള്‍ മനസ്സ് തുറന്നു പറയുക ആണെന്ന് അറിയാം..

എന്റെ കൂട്ടുകാരിക്ക് teacherനെ കാണണം എന്നു പറഞ്ഞു ഒരിക്കല്‍ എന്റെ പഴയ ഒരു വിദ്യാര്‍ഥിനി കൊണ്ട് വന്നതാണ് അവളെ...

അമ്മയും അച്ഛനും എങ്ങനെ സ്‌നേഹിച്ചിരുന്നതാണ് എന്നറിയോ.. 

എനിക്ക് കുശുമ്പ് വരുമായിരുന്നു.. 

ഒരേപാത്രത്തില്‍ കഴിക്കും, ഒരുമിച്ചു പത്രം വായിക്കും, ചര്‍ച്ചകള്‍ നടത്തും, വൈകുന്നേരങ്ങളില്‍ നടക്കാന്‍ ഇറങ്ങും.. 

അച്ഛന്റെ അമ്മയും അച്ഛനും കൂടെ ഉണ്ടായിരുന്നു.. 

സ്‌നേഹം ആവോളം കിട്ടി ഞാന്‍ വളര്‍ന്നു.. 

എനിക്ക് പതിമൂന്നു വയസ്സുള്ളപ്പോള്‍ അനിയന്‍ ഉണ്ടായി.. 

അവനു ഒരു വയസ്സ് തികയും മുന്‍പാണ് അച്ഛന്‍ മരിച്ചത്..

അറ്റാക്ക് ആയിരുന്നു.. 

പ്രതീക്ഷിക്കാത്ത മരണം.. 

അമ്മ കരഞ്ഞില്ല, ഒരേ ഇരുപ്പായിരുന്നു.. 

പേടിയായിരുന്നു എല്ലാര്‍ക്കും. 

അമ്മയുടെ ഓഫീസില്‍ നിന്നും എന്നും ഓരോ സഹപ്രവര്‍ത്തകര്‍ എത്തും.. 

സംസാരിക്കും.. 

അനില്‍ അങ്കിള്‍ ആയിരുന്നു അധികവും വരിക..

അച്ഛനുള്ളപ്പോ വരാറുണ്ടായിരുന്നു.. 

അങ്കിള്‍ ന്റെ ഭാര്യ മറ്റൊരു ആളിന്റെ ഒപ്പം പോയി എന്നു അമ്മ അമ്മുമ്മയോടു പറയുന്നത് ഞാന്‍ കേട്ടിട്ടുണ്ട്..അച്ഛന്‍ കുറെ സമാധാനിപ്പിക്കുകയും ഒക്കെ ചെയ്യും വരുമ്പോ.. 

അച്ഛന്‍ മരിച്ചു കഴിഞ്ഞു അങ്കിള്‍ വരുമ്പോ എനിക്ക് എന്തോ ഇഷ്ടകേടായിരുന്നു.. 

അമ്മ ഓഫീസില്‍ നിന്നും വന്നാലും ുവീില വിളിക്കും.. 

ഓരോ കാര്യങ്ങള്‍ക്കും കൂടെ നില്‍ക്കും.. 

അമ്മ എന്റെ അച്ഛനെ മറക്കുന്നത് പോലെ തോന്നി.. 

അതെനിക്ക് സഹിക്കാന്‍ വയ്യായിരുന്നു.. 

മോനു അങ്കിള്‍ വരുമ്പോള്‍ കൂടെ ചിരിക്കുകയും കളിക്കുകയും ഒക്കെ ചെയ്യും.. 

അമ്മുമ്മയും അപ്പൂപ്പനും അങ്കിള്‍ വരുന്നത് ഒരു സമാധാനം ആണ് എന്നു തോന്നി.. 

അച്ഛന്‍ ഒറ്റ മകന്‍ ആയിരുന്നു.. 

ആ സ്ഥാനത്തു നിന്നാണ് അങ്കിള്‍ അവര്‍ക്ക് എല്ലാം ചെയ്യുന്നത് എന്നു അപ്പുപ്പന്‍ പറഞ്ഞപ്പോള്‍ എനിക്ക് ദേഷ്യം വന്നു.. 

എനിക്ക് മാത്രം പറ്റുന്നില്ലായിരുന്നു..

മോള്‍ക്ക് അങ്കിള്‍ ഈ വീട്ടില് താമസിക്കുന്നത് ഇഷ്ടമാണോ എന്നു ഒരു രാത്രിയില്‍ അമ്മ എന്നെ കെട്ടിപിടിച്ചു കിടക്കുമ്പോള്‍ ചോദിച്ചു. 

അമ്മയുടെ കൈ തട്ടി മാറ്റിയിട്ടു ഞാന്‍ കുറെ കരഞ്ഞു.. 

കുറെ നേരം അനങ്ങാതെ കിടന്നിട്ടു, അമ്മ എന്നെ അണച്ചു ചേര്‍ത്ത് കുറെ ഉമ്മ തന്നു... 

ആ ദിവസം കഴിഞ്ഞു അങ്കിള്‍ വീട്ടില് വന്നിട്ടില്ല.. 

ഞാന്‍ കാണ്‍കെ ുവീില വിളിച്ചിട്ടില്ല.. 

എനിക്ക് സമാധാനം ആയിരുന്നു.. 

അമ്മയും സ്വാഭാവികമായി പെരുമാറി..

ഒരു ദിവസം അമ്മുമ്മ കരഞ്ഞു കൊണ്ടിരിക്കുന്നതാണ് ഞാന്‍ സ്‌കൂളില്‍ നിന്നും വന്നപ്പോള്‍ കണ്ടത്.. 

അമ്മ ഒന്നും മിണ്ടാതെ അടുത്തിരിക്കുന്നു.. 

അങ്കിള്‍ നു സുഖമില്ല എന്നും സീരിയസ് ആണെന്നും അമ്മ പറഞ്ഞു.. 

ഞാന്‍ അമ്മയെ നോക്കി.. 

സങ്കടമോ ഭീതിയോ എന്നൊന്നും അല്ലാത്ത മറ്റെന്തോ ഭാവം.. 

പനി കൂടിയതാണ് അങ്കിള്‍നു.. 

അത്രയും ഉള്ളോ.. 

സീരിയസ് ആകില്ല, ഞാന്‍ എന്നെ തന്നെ സമാധാനപ്പെടുത്തി.. പക്ഷെ, 

അങ്കിള്‍ മരിച്ചു രണ്ടു ദിവസത്തിനുള്ളില്‍.. 

അപ്പുപ്പനോട് ഒപ്പം, 

അമ്മ മരണത്തിനു പോയിട്ട് വന്നു, ഞങ്ങള്‍ക്ക് ഭക്ഷണം തന്നു, പഠിപ്പിച്ചു.. മോനു കളിക്കണം എന്നു പറഞ്ഞപ്പോള്‍ അതും ചെയ്തു.. 

എന്നത്തേയും പോലെ എല്ലാം നടന്നു.. 

എനിക്ക് ഒരു വിധം സമാധാനമായി.. 

എപ്പോഴോ ഉണര്‍ന്നു നോക്കിയപ്പോള്‍ അമ്മയില്ല അരികില്‍.. 

അടുത്ത മുറിയില്‍ ഇരുട്ടത്തു വാ പൊത്തി, നെഞ്ച് പിളര്‍ന്നു കരയുന്ന അമ്മയെ ഞാന്‍ കണ്ടെന്നു അമ്മ അറിഞ്ഞില്ല.. 

ഞാന്‍ വല്ലാതായി പോയ്.. 

അച്ഛന്‍ മരിച്ചപ്പോള്‍ പോലും അമ്മ ഇങ്ങനെ തകര്‍ന്നിട്ടില്ല എന്നു തോന്നി..

അങ്കിള്‍ നെ കുറിച്ചു ഞാനോ അമ്മയോ പിന്നെ സംസാരിച്ചിട്ടില്ല..

ടീച്ചറെ, ഞാന്‍ ചെയ്തത് തെറ്റാണോ? 

എനിക്ക് ഇപ്പോള്‍ ഒരു ബന്ധം ഉണ്ട്.. 

വീട്ടില് സമ്മതിച്ചു.. 

വിവാഹം കഴിഞ്ഞാല്‍ വിദേശത്ത് പോകും.. 

അനിയന്‍ സ്‌കൂളില്‍ ആണ്.. 

അപ്പുപ്പന്‍ മരിച്ചു.. 

അമ്മുമ്മ കിടപ്പിലും ആണ്. 

അമ്മ ഒരു പുനര്‍വിവാഹം കഴിക്കണം എന്നു ഞാന്‍ ഇപ്പൊ ഒരുപാട് ആഗ്രഹിക്കുന്നുണ്ട്.. 

ഞാന്‍ അതു പറയുകയും ചെയ്തു.. 

ഒരിക്കലും അങ്ങനെ ഉണ്ടാകില്ല എന്നു അമ്മ തീര്‍ത്തു പറയുന്നു.. 

എനിക്കു അതു ഭയങ്കര സങ്കടം ആയി..

മോളോട് ഉള്ള വാശി അല്ലെടാ.. 

അമ്മ ഇനി ഒരാളെ വിവാഹം കഴിക്കില്ല..

ഞാന്‍ പെട്ടന്ന് മറുപടി പറഞ്ഞപ്പോള്‍ അവള്‍ അമ്പരന്നു..

അമ്മയെ കാണാതെ? 

കാണേണ്ട...ചിലരെ അറിയാന്‍ കാണണം എന്നില്ല.. 

സ്‌നേഹം കിട്ടാത്തവര്‍ ആണ്, ഇനിയും കൊതിക്കുക.. 

അവര്‍ പൂര്‍ണ്ണമായും സ്‌നേഹിക്കപെട്ട ഒരുവളാണ്.. 

ആദ്യത്തെ പുരുഷനില്‍ നിന്നും കിട്ടാതെ എന്തുണ്ടായിരുന്നോ, അതു അല്പ കാലം കൊണ്ട്, 

പിന്നെ വന്ന ആള് നല്‍കി.. 

അതില്‍ ഒടുങ്ങി എല്ലാ ആഗ്രഹങ്ങളും.. 

എന്തിനാണ് ഒരുപാട് നാള്‍.? 

ഒറ്റ ദിവസം ആയാലും പോരേ..??

അത്രമേല്‍ സ്‌നേഹിച്ച ഒരാളുടെ നെഞ്ചത്ത് ചേര്‍ന്നു കിടന്ന അല്പം നേരത്തിന് എന്ത് മാത്രം ശക്തിയാണ് തരാന്‍ കഴിക.. 

ആ ഒരു ഓര്മ്മ പോരേ.. 

കാണപ്പെടാത്ത ഈശ്വരനും കാണപ്പെടുന്ന സ്‌നേഹവുമായി ഒരാള്‍.. 

പെട്ടന്ന് നഷ്ടമായാല്‍ കൂടി, 

ജീവിതാവസാനം വരെ മറ്റൊരു പുരുഷനും പിന്നെ സ്ഥാനമില്ല..

ആണോ? 

മ്മ്മ്.. ഉറപ്പ്..

സ്ത്രീ  പുരുഷ ബന്ധത്തിന്റെ പലതും ഞാന്‍ ഇനി പഠിക്കണം അല്ലേ ടീച്ചര്‍, 

അറിയാന്‍ ഇനിയും എത്രയോ ബാക്കി...
 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com