മാതൃത്വത്തിന്റെ മഹിമ വാക്കുകളില്‍ ഒതുങ്ങുന്നതല്ല. അത്രയ്ക്ക് അര്‍ത്ഥതലമുളളതാണ്. മരണം തട്ടിയെടുത്തിട്ടും കുഞ്ഞിനെ മാറോടണച്ച് നില്‍ക്കുന്ന ഒരമ്മയുടെ ഉളളുലയ്ക്കുന്ന വീഡിയോയാണ് ഇപ്പോള്‍ സാമൂഹ്യമാധ്യമങ്ങളില്‍ വ്യാപകമായി പ്രചരിക്കുന്നത്.
ചൈനയിലെ ഹുബൈയിലെ സിങ്‌യാങ് മൃഗശാലയില്‍ നിന്നാണ് മാതൃത്വത്തിന്റെ കണ്ണുനനയിക്കുന്ന കാഴ്ച. ഏതാനും ദിവസങ്ങള്‍ക്ക് മുന്‍പാണ് മൃഗശാലയിലെ ഒരു പെണ്‍കുരങ്ങ് ഒരു കുഞ്ഞിനെ പ്രസവിക്കുന്നത്. ജനിച്ചപ്പോള്‍ തന്നെ കുഞ്ഞിന് തീരെ ആരോഗ്യമില്ലായിരുന്നു. രണ്ടു ദിവസം കഴിഞ്ഞ് കുഞ്ഞ് ചത്തു.
ചത്ത കുഞ്ഞിന്റെ ശരീരം മാറോടണച്ച് തള്ളക്കുരങ്ങ് കാണിക്കുന്ന സ്‌നേഹപ്രകടനം ആരെയും കരയിക്കുന്നതാണ്. മൃഗശാലയിലെ ഒരു മരച്ചുവട്ടില്‍ കുഞ്ഞിന്റെ ചലനമറ്റ ശരീരം അടക്കിപ്പിടിച്ച് അമ്മ കുരങ്ങ് ഒരേയിരിപ്പാണ്. കുഞ്ഞിനെ നക്കിതോര്‍ത്തിയും തലോടിയും പെണ്‍കുരങ്ങ് പരിപാലിക്കുന്നു. അത് ചത്തുപോയ കാര്യം ഇതുവരെയും മനസിലായിട്ടില്ലെന്നാണ് അധികൃതര്‍ വ്യക്തമാക്കുന്നത്. കുലുക്കി വിളിച്ചിട്ടും കുഞ്ഞ് അനങ്ങാത്തപ്പോള്‍ അതിനെ പിച്ചി ഉണര്‍ത്താനും പെണ്‍കുരങ്ങ് ശ്രമിക്കുന്നുണ്ട്. ഇടയ്ക്ക് കുഞ്ഞിനെ താഴെവെച്ചിട്ട് ദുരെ മാറിനിന്ന് കുരങ്ങ് തുറിച്ചുനോക്കുന്നുമുണ്ട്. മൂന്ന് വയസുള്ള കുരങ്ങിന്റെ ആദ്യപ്രസവമായിരുന്നു ഇത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
