പ്രായത്തെ തോല്‍പ്പിച്ച് ലോകത്തെ അത്ഭുതപ്പെടുത്തിയ പലരേയും നമ്മള്‍ കണ്ടിട്ടുണ്ട്. ആ കൂട്ടത്തിലേക്ക് ഇതാ ഒരു മുത്തശ്ശി കൂടി. 73ാം വയസുകാരിയായ ജൊവാന് മാക്‌ഡൊണാള്‍ഡാണ് തന്റെ മസില്‍ ബോഡിയുമായി ലോകത്തെ അമ്പരപ്പിക്കുന്നത്.ഇന്ന് സോഷ്യല്‍ മീഡിയയില്‍ നിരവധി ആരാധകരുള്ള താരമാണ് കാനഡക്കാരിയായ ഫിറ്റ്‌നസ് ഫ്രീക്ക് മുത്തശ്ശി.
അമിത ഭാരത്തിനൊപ്പം രക്തസമ്മര്‍ദ്ദം, കൊളസ്‌ട്രോള്‍ തുടങ്ങിയ പ്രശ്‌നങ്ങള്‍കൊണ്ടും ബുദ്ധിമുട്ടാന്‍ തുടങ്ങിയതോടെയാണ് ജൊവാന് തന്റെ ജീവിതരീതിയില്‍ മാറ്റം വരുത്താന്‍ തീരുമാനിക്കുന്നത്. അങ്ങനെ മൂന്ന് വര്‍ഷം മുന്‍പ് ജൊവാന് ജിമ്മില്‍ എത്തി. അഞ്ചടി മൂന്ന് ഇഞ്ച് ഉയരമുണ്ടായിരുന്ന ജൊവാന് 89 കിലോ ആയിരുന്നു ഭാരം. കൃത്യമായ വര്‍ക്കൗട്ടിലൂടെ 22 കിലോ ഭാരമാണ് ജൊവാന് കുറച്ചത്. അതിനൊപ്പം ദൃഡമായ മസില്‍ ബോഡിയും. മൂന്ന് വര്‍ഷമായി തന്റെ ഹെല്‍ത്തി ബോഡിയെ അതേപോലെ തന്നെ നിലനിര്‍ത്താനും ജൊവാന് സാധിക്കുന്നുണ്ട്.
ഇന്ന് ഈ സീനിയര്‍ ബോഡിബിള്‍ഡര്‍ അഞ്ച് ലക്ഷത്തില്‍ അധികം ഫോളോവേഴ്‌സുള്ള സോഷ്യല്‍ മീഡിയ താരമാണ്. ട്രെയിന്‍ വിത്ത് ജൊവാന് എന്ന ഫേയ്‌സ്ബുക്ക് പേജിലൂടെ തന്റെ വര്‍ക്കൗട്ട് വിഡിയോകളും മറ്റു വിശേഷങ്ങളും പങ്കുവെക്കാറുണ്ട്. മൂന്ന് വര്‍ഷം മുന്‍പത്തെ തന്റെ ചിത്രവും ഇപ്പോഴത്തെ ചിത്രവും വെച്ചുള്ള ഒരു കുറിപ്പ് സോഷ്യല്‍ മീഡിയയില്‍ വൈറലാവുകയാണ്. വര്‍ക്കൗട്ടിനൊപ്പം ജൊവാന് കൃത്യമായ ഡയറ്റ് പിന്തുടരുന്നുണ്ടെന്നാണ് ന്യൂയോര്‍ക്ക് പോസ്റ്റ് റിപ്പോര്‍ട്ട് ചെയ്യുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
