ലെസ്റ്റര്: പ്രീമിയര് ലീഗ് ഈ സീസണില് തിരിച്ചടി നേരിട്ടുകൊണ്ടിരിക്കുന്ന ലെസ്റ്റര് സിറ്റിക്ക് ലിവര്പൂളിനെതിരേ ഉജ്ജ്വല ജയം. ഒന്നിനെതിരേ മൂന്ന് ഗോളുകള്ക്കാണ് കുറുക്കന്മാരുടെ ജയം. കഴിഞ്ഞ സീസണില് കിരീടം നേടിക്കൊടുത്ത മുഖ്യ പരിശീലകന് ക്ലോഡിയോ റനിയേരിയെ പുറത്താക്കിയതിന് ശേഷം മാനേജറില്ലാതെയാണ് സ്വന്തം മൈതാനമായ കിംഗ് പവര് സ്റ്റേഡിയത്തില് ലിവറിനെതിരേ ലെസ്റ്റര് കളിക്കാനിറങ്ങിയത്.
കഴിഞ്ഞ സീസണ് കിരീട നേട്ടത്തില് ടീമിന്റെ നട്ടെല്ലായിരുന്ന ജാമി വാര്ഡി 27ാം മിനുട്ടില് അവസരം മുതലാക്കിയതോടെ ഈ വര്ഷം ഇതുവരെ പ്രീമിയര് ലീഗില് ഗോളൊന്നും നേടിയില്ലെന്ന പരാതിക്ക് പരിഹാരമായി. ലീഗില് അഞ്ചാം സ്ഥാനത്തുള്ള ലിവര്പൂള് മുന്നേറ്റം ഇരച്ചെത്തിയപ്പോഴും പതറാതിരുന്ന ലെസ്റ്റര് പ്രതിരോധനിര കളിയില് മികച്ചു നിന്നു. 39ാം മിനുട്ടില് ഡാനി ഡ്രിങ്ക്വാട്ടറിലൂടെ ലീഡുയര്ത്തിയ ലെസ്റ്റര് 60ാം മിനുട്ടിലൂടെ ലീഡ് മൂന്നാക്കി ഉയര്ത്തി. ഇത്തവണ വാര്ഡിയുടെ ഹെഡറാണ് ഗോളൊരുക്കിയത്.
68ാം മിനുട്ടില് കുട്ടീഞ്ഞോ ലിവര്പൂളിന്റെ ആശ്വാസ ഗോള് നേടി. 26 കളികളില് നിന്ന് 49 പോയിന്റുള്ള ലിവര്പൂള് ലീഗില് അഞ്ചാം സ്ഥാനത്തും ഇത്രയും കളികളില് നിന്ന് 24 പോയിന്റ് നേടിയ ലെസ്റ്റര് പോയിന്റ് പട്ടികയില് 15ാം സ്ഥാനത്തുമാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ