അണ്ടർ 17 ലോകകപ്പിൽ ഇന്ത്യൻ ടീമിനായി ശ്രദ്ധേയ പ്രകടനം നടത്തിയ കോമൾ തട്ടാൽ ഇന്ത്യൻ സീനിയർ ടീമിലേക്ക്. ജോർദാനെതിരായ സൗഹൃദ മത്സരത്തിനായുള്ള ഇന്ത്യൻ ഫുട്ബോൾ ടീമിലേക്കാണ് 18കാരനായ കോമൾ തട്ടാൽ ഇടം പിടിച്ചത്. പരുക്കേറ്റ് പുറത്തായ സുനിൽ ഛേത്രിക്ക് പകരക്കാരനായാണ് കോമളിനെ പരിശീലകൻ കോൺസ്റ്റന്റൈൻ പരിഗണിച്ചത്. അണ്ടർ 17 ടീമിൽ നിന്ന് ഇന്ത്യൻ സീനിയർ ടീമിൽ എത്തുന്ന ആദ്യ താരം എന്ന നേട്ടവും കോമൾ ഇതോടെ സ്വന്തമാക്കി. ഈ മാസം 17നാണ് ജോർദാനുമായുള്ള ഇന്ത്യയുടെ മത്സരം.
എെഎസ്എല്ലിൽ നിലവിൽ എടികെയുടെ താരമാണ് കോമൾ. സീസണിൽ നടത്തിയ തകർപ്പൻ പ്രകടനമാണ് കോമളിന് ഇന്ത്യൻ ടീമിൽ ഇടം നേടിക്കൊടുത്തത്. അണ്ടർ 17ന് ലോകകപ്പിൽ അമേരിക്കക്കെതിരായ ആദ്യ മത്സരത്തിൽ മികച്ച പ്രകടനം നടത്തിയാണ് കോമൾ ശ്രദ്ധേയനായത്. എന്നാൽ പിന്നീടുള്ള മത്സരങ്ങളിൽ താരത്തിന് കളിക്കാൻ സാധിച്ചില്ല.
എടികെ പരിശീലകൻ സ്റ്റീവ് കോപ്പൽ താരത്തിന് കൂടുതൽ അവസരങ്ങൾ നൽകി. ഈ സീസണിൽ 340 മിനുട്ടുകളോളം കോമൾ എടികെയ്ക്കായി കളിച്ചു. ഒരു ഐഎസ്എൽ ഗോളും കോമൾ നേടിയിരുന്നു. ബംഗളൂരു എഫ്സിക്കെതിരെ ആയിരുന്നു താരത്തിന്റെ ഗോൾ.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ