ആദ്യ ടെസ്റ്റിലെ നാണക്കേടില്‍ നിന്നും വെസ്റ്റ് ഇന്‍ഡീസ് കരകയറി വരുന്നു. രണ്ടാം ടെസ്റ്റിലെ ആദ്യ ഇന്നിങ്‌സില്‍ വമ്പന്‍ ലീഡ് ഉയര്‍ത്താന്‍ അനുവദിക്കാതെ ഇന്ത്യയെ പിടിച്ചു നിര്‍ത്താന്‍ വിന്‍ഡിസ് ബൗളര്‍മാര്‍ക്കായി. ഹൈദരാബാദ് ടെസ്റ്റില്‍ 367 റണ്‍സിന് ഇന്ത്യയുടെ ഒന്നാം ഇന്നിങ്‌സ് അവസാനിച്ചു.
56 റണ്‍സിന്റെ ഒന്നാം ഇന്നിങ്‌സ് ലീഡാണ് ഇന്ത്യയുടെ പക്കലുള്ളത്. ജാസന്‍ ഹോള്‍ഡറിന്റെ അഞ്ച് വിക്കറ്റ് നേട്ടമാണ് ഇന്ത്യയുടെ കുതിപ്പിന് തടയിട്ടത്. റണ്‍ എടുക്കുന്നതിന് മുന്‍പ് രാഹുലിനെ മടക്കി തുടങ്ങിയ ഹോള്‍ഡര്‍, രഹാനയേയും, ജഡേജയേയും കുല്‍ദീപിനേയും കൂടെ പവലിയനിലേക്ക് എത്തിച്ച് ലീഡ് ഉയര്‍ത്താനുള്ള ഇന്ത്യയുടെ ശ്രമത്തെ തകര്‍ത്തു.
രണ്ടാം ടെസ്റ്റില്‍ മികച്ച ഓള്‍ റൗണ്ടര്‍ പ്രകടനമാണ് വിന്‍ഡിസ് നായകന്‍ ഹോള്‍ഡറില്‍ നിന്നും വന്നത്. ഒന്നാം ഇന്നിങ്‌സില്‍ അര്‍ധശതകം നേടി ടീമിന്റെ സ്‌കോര്‍ ഉയര്‍ത്തിയതിന് പിന്നാലെയാണ് ഹോള്‍ഡര്‍ ഇന്ത്യയുടെ അഞ്ച് വിക്കറ്റും പിഴുതത്. മൂന്നാം ദിനം 35 റണ്‍സ് എടുത്ത് നില്‍ക്കെ അശ്വിന്റെ വിക്കറ്റ് ഗ്രബ്രിയേല്‍ വീഴ്ത്തിയതോടെയാണ് ഇന്ത്യയുടെ ഒന്നാം ഇന്നിങ്‌സ് ചെറുത്ത് നില്‍പ്പ് അവസാനിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
