ഓസ്‌ട്രേലിയ തങ്ങളുടെ ലോകകപ്പ് ടീമിനെ പ്രഖ്യാപിച്ചതിന് പിന്നാലെ ഐപിഎല്‍ ആരാധകര്‍ക്ക് ആശങ്ക. ഓസീസ് താരങ്ങളായ സ്റ്റീവ് സ്മിത്ത്, ഡേവിഡ് വാര്‍ണര്‍ എന്നിവര്‍ ഈ മാസം അവസാനത്തോടെ തങ്ങളുടെ ഐപിഎല്‍ ടീം വിടുമെന്നാണ് റിപ്പോര്‍ട്ട്.
മെയ് രണ്ടിനാണ് ഓസ്‌ട്രേലിയന്‍ ടീമിന്റെ ലോകകപ്പ് ട്രെയിനിങ് ക്യാംപ് ആരംഭിക്കുന്നത്. ഓസ്‌ട്രേലിയന്‍ ഇലവന്‍, ന്യൂസിലാന്‍ഡ് ഇലവന്‍ എന്നിവരുമായിട്ട് മൂന്ന് പരിശീലന മത്സരങ്ങളും ഉള്‍പ്പെടുന്നതാണ് ഓസീസിന്റെ ലോകകപ്പ് ഒരുക്കം. സ്റ്റീവ് സ്മിത്തിനേയും ഡേവിഡ് വാര്‍ണറേയും കൂടാതെ, ബെഹ്‌റെന്‍ഡോര്‍ഫ്, മാര്‍കസ് സ്റ്റൊയ്‌നിസ് എന്നിവരും ഈ മാസം അവസാനത്തോടെ നാട്ടിലേക്ക് തിരിക്കും.
ഐപിഎല്ലിലെ റോയല്‍ ചലഞ്ചേഴ്‌സ് ബാംഗ്ലൂരിന്റെ മോശം പ്രകടനത്തെ തുടര്‍ന്ന് സ്‌റ്റൊയ്‌നീസ് നേരത്തെ ഓസ്‌ട്രേലിയയിലേക്ക് മടങ്ങിയേക്കുമെന്നും റിപ്പോര്‍ട്ടുണ്ട്. ഐപിഎല്‍ പന്ത്രണ്ടാം സീസണില്‍ ബാംഗ്ലൂര്‍ ആദ്യ ജയം നേടിയപ്പോള്‍ 16 പന്തില്‍ നിന്നും 28 റണ്‍സ് നേടിയ സ്റ്റൊയ്‌നിസിന്റെ ഇന്നിങ്‌സ് നിര്‍ണായകമായിരുന്നു.
വാര്‍ണറുടെ മടക്കമാകും ഇതില്‍ ഐപിഎല്‍ പ്രേമികളെ ഏറെ നിരാശപ്പെടുത്തുത. നിലവില്‍ 400 റണ്‍സോടെ ഓറഞ്ച് ക്യാപ് വാര്‍ണറുടെ കൈവശമാണ്. ഒരു സെഞ്ചുറിയും നാല് അര്‍ധ സെഞ്ചുറിയും വാര്‍ണര്‍ ഇതുവരെ നേടിക്കഴിഞ്ഞു. സ്റ്റീവ് സ്മിത്തിന് പക്ഷേ ഇതുവരെ ഫോം കണ്ടെത്തുവാനായിട്ടില്ല. ഏഴ് മത്സരങ്ങളില്‍ നിന്നും 186 റണ്‍സാണ് സ്മിത്ത് നേടിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
