ജമൈക്ക: വരാനിരിക്കുന്ന ലോകകപ്പിനു ശേഷം ഏകദിന ക്രിക്കറ്റില്‍ നിന്ന് വിരമിക്കുമെന്ന് വെസ്റ്റിന്‍ഡീസ് വെടിക്കെട്ട് ബാറ്റ്‌സ്മാന്‍ ക്രിസ് ഗെയ്ല്‍. ഏറെ കാലത്തിനു ശേഷം ഇംഗ്ലണ്ടിനെതിരായ ഏകദിന പരമ്പരയ്ക്കുള്ള വിന്‍ഡീസ് ടീമില്‍ അവസരം ലഭിച്ചതിന് പിന്നാലെയാണ് തന്റെ ഭാവിയെ കുറിച്ച് ഗെയ്ല്‍ വെളിപ്പെടുത്തിയത്. ലോകകപ്പിനുള്ള ടീമില്‍ ഇടം ലഭിച്ചാല്‍ അത് തന്റെ അവസാന ടൂര്‍ണമെന്റായിരിക്കുമെന്ന് ഗെയ്ല്‍ വ്യക്തമാക്കി.
താന്‍ ലോകത്തിലെ ഏറ്റവും മികച്ച താരമാണെന്നും യൂനിവേഴ്‌സ് ബോസ് താന്‍ അല്ലാതെ മറ്റാരുമല്ലെന്നും അതിനു ഒരു മാറ്റവും സംഭവിക്കില്ലെന്നും 39 വയസുകാരനായ ഗെയ്ല്‍ വ്യക്തമാക്കി. ലോകകപ്പിനു ശേഷം ഏകദിനങ്ങളില്‍ തനിക്ക് പകരം യുവാക്കള്‍ വിന്‍ഡീസ് നിരയില്‍ എത്തണമെന്ന് ഗെയ്ല്‍ പറഞ്ഞു. ലോകകപ്പ് നേടുകയെന്നത് തീര്‍ച്ചയായും സവിശേഷമായ അനുഭവമാണ്. ടീമിലെ യുവ താരങ്ങള്‍ തനിക്ക് ലോകകപ്പ് നേടാന്‍ ശ്രമിക്കണം. ടീമിലുണ്ടെങ്കില്‍ താനും അതിനായി അവര്‍ക്കൊപ്പം പോരാടും.
അതേസമയം ഏകദിനത്തില്‍ നിന്ന് വിരമിക്കുമെന്ന് പ്രഖ്യാപിച്ച താരം ലോകത്തിലെ വിവിധ ടി20 ടൂര്‍ണമെന്റുകളില്‍ കളിക്കാമെന്ന പ്രതീക്ഷയിലാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
