റാഞ്ചി: മുൻ ഇന്ത്യൻ നായകൻ മഹേന്ദ്ര സിങ് ധോണിയുടെ പുതിയ ലുക്കാണ് ഇപ്പോൾ സോഷ്യൽ മീഡിയയിലും പുറത്ത് ചർച്ചാ വിഷയം. നിലവിലെ ഇന്ത്യൻ ടീമിന്റെ നായകനല്ലെങ്കിൽ പോലും ടീമിലെ നിർണായക സാന്നിധ്യം വെറ്ററൻ താരം തന്നെയാണ് ഇപ്പോഴും. ഐപിഎല്ലില്‍ ചെന്നൈ സൂപ്പര്‍ കിങ്‌സിന്റെ നായകനായ ധോനിയെ 'തല' എന്ന പേരിലാണ് ആരാധകർ വിശേഷിപ്പിക്കുന്നത്. ആ 'തല' സ്വന്തം തലയില്‍ ചെറിയ മാറ്റങ്ങള്‍ വരുത്തിയതോടെ ആരാധകർ അത് ആഘോഷമാക്കുകയാണിപ്പോൾ. മുടി വെട്ടി താടിയും മീശയും കളഞ്ഞ് ധോനി കൂടുതല്‍ ചെറുപ്പമായി.
ധോനിയുടെ ഈ സ്‌റ്റൈല്‍ കാണാന്‍ ആരാധകര്‍ തിരക്കു കൂട്ടിയതും സോഷ്യല്‍ മീഡിയയില്‍ ചര്‍ച്ചയായി. ഓള്‍ സ്റ്റാര്‍ ഫുട്‌ബോള്‍ ക്ലബിന്റെ പരിപാടിയില്‍ പങ്കെടുക്കാനെത്തിയ ധോനിയെ ആരാധകര്‍ വളയുകയായിരുന്നു. ഇതോടെ താരത്തിന്റെ കാര്‍ മുന്നോട്ടെടുക്കാന്‍ ബുദ്ധിമുട്ടി. സെല്‍ഫി എടുക്കാനായിരുന്നു എല്ലാവരും തിരക്ക് കൂട്ടിയത്.
ഫെബ്രുവരി 24ന് ഓസ്ട്രേലിയയുടെ ഇന്ത്യാ പര്യടനത്തിന് തുടക്കമാകുകയാണ്. രണ്ട് ടി20കളും അഞ്ച് ഏകദിനങ്ങളുമാണ് പരമ്പരയിലുള്ളത്. ഈ പുതിയ ലുക്കിലാകും ധോനി ഓസ്‌ട്രേലിയക്കെതിരായ പരമ്പരയില്‍ കളിക്കുക.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
