എകപക്ഷീയമായ ആറ് ഗോളുകള്‍, എംഇഎസ് കെവിഎം കോളെജിനെ തറപറ്റിച്ച് ഫറൂഖ് കോളെജ് ക്വാര്‍ട്ടര്‍ ഫൈനലില്‍ 

By സമകാലിക മലയാളം ഡെസ്‌ക്‌  |   Published: 11th January 2019 06:05 AM  |  

Last Updated: 11th January 2019 06:05 AM  |   A+A-   |  

goal_3

കൊച്ചി: ദി ന്യൂ ഇന്ത്യന്‍ എക്‌സ്പ്രസിന്റെ ആഭിമുഖ്യത്തില്‍ നടക്കുന്ന ഗോള്‍ ഓള്‍ കേരള ഇന്റര്‍ കോളെജ് ഫുട്‌ബോള്‍ ടൂര്‍ണമെന്റില്‍ കോഴിക്കോട് ഫറൂഖ് കോളെജ്  ക്വാര്‍ട്ടര്‍ ഫൈനലില്‍. ഇന്നലെ മഹാരാജാസ് കോളേജ് ഗ്രൗണ്ടില്‍ നടന്ന മത്സരത്തില്‍ എംഇഎസ് കെവിഎം കോളെജിനെയാണ് ഫറൂഖ് കോളെജ് പരാജയപ്പെടുത്തിയത്. എതിരില്ലാത്ത ആറ് ഗോളുകള്‍ക്കായിരുന്നു ജയം. 

ആലുവ യുസി കോളെജിനെ എകപക്ഷീയമായ അഞ്ച് ഗോളുകള്‍ക്ക് പരാജയപ്പെടുത്തിയാണ് എംഇഎസ് പ്രീക്വാര്‍ട്ടറിലേക്ക് യോഗ്യത നേടിയത്. പ്രീക്വാര്‍ട്ടര്‍ മത്സരത്തിന്റെ തുടക്കം മുതല്‍ കളിയില്‍ ഫറൂഖ് വ്യക്തമായ ആധിപത്യം നേടിയെടുത്തിരുന്നു. മുന്‍ മത്സരത്തില്‍ ഹാട്രിക് നേട്ടമടക്കം സ്വന്തമാക്കിയ എംഇഎസിന്റെ ജിന്‍ഷാദ് അടക്കമുള്ളവര്‍ ഫറൂഖിന്റെ പ്രതിരോധ നിരയ്ക്കുമുന്നില്‍ നിറംമങ്ങി. 

ഹട്രിക് ഗോള്‍ നേട്ടം സ്വന്തമാക്കിയ താഹിര്‍സമാന്‍ ആണ് കളിയില്‍ താരമായത്. അഞ്ചാം മിനിറ്റില്‍ ആദ്യ ഗോള്‍ നേട്ടം ഫറൂഖ് സ്വന്തമാക്കി. താഹിര്‍സമാന്‍ ആയിരുന്നു സ്‌കോര്‍ ബോര്‍ഡ് തുറന്നത്. പിന്നീട് 15-ാം മിനിറ്റില്‍ മുഹമ്മദ് ഇസ്ഹലിന്റെ ബുട്ടില്‍ നിന്ന് രണ്ടാം ഗോളും പിറന്നു. 32-ാം മിനിറ്റില്‍ സുഹൈല്‍ എംഎയും ഗോള്‍ വല കുലുക്കിയതോടെ ആദ്യ പകുതിയില്‍ 3-0ലീഡ് ഫറൂഖ് നേടിയിരുന്നു. രണ്ടാം പകുതി ആദ്യാവസാനം ഒരു താഹിര്‍സമാന്‍ ഷോ തന്നെയായിരുന്നു. 57-ാം മിനിറ്റിലും 68-ാം മിനിറ്റിലും താഹിര്‍സമാന്‍ ഗോളുകള്‍ നേടി. ഒടുവില്‍ 71-ാം മിനിറ്റില്‍ മുഹമ്മദ് സലില്‍ സ്‌കോര്‍ ആറായി ഉയര്‍ത്തി. ഈ വിജയത്തോടെ ഫറൂഖ് ക്വാര്‍ട്ടര്‍ ഫൈനലിലേക്ക് കുതിച്ചു.