കൊൽക്കത്ത: മോഹൻ ബഗാനെതിരായ നാട്ടങ്കത്തിൽ ഈസ്റ്റ് ബംഗളിനായി ഗോൾ നേടുകയും ഒരു ഗോളിന് വഴിയൊരുക്കുകയും ചെയ്തത് മലയാളി ജോബി ജസ്റ്റിനായിരുന്നു. ബൈസിക്കിൾ കിക്കിലൂടെ കൊൽക്കത്തക്കാരുടെ മനം കവർന്ന ജോബി പക്ഷേ ബൈസിക്കിൾ തീവ്സിന് മുന്നിൽ തോറ്റുപോയി.
ജോബി ജസ്റ്റിൻ കൊൽക്കത്തക്കാരുടെ സൈക്കിൾ മാനാണ്. ജോബി കളിക്കാനെത്തുന്നത് തന്റെ പ്രിയപ്പെട്ട സൈക്കിളിലാണ്. മോഹൻ ബഗാനെതിരായ നാട്ടങ്കം ജയിച്ചതിന്റെ സന്തോഷത്തിനിടെയിലും ജോബിക്ക് പക്ഷേ സങ്കടമായിരുന്നു. നാട്ടങ്കത്തിന് രണ്ട് ദിവസം മുൻപാണ് ജോബിയുടെ സൈക്കിൾ മോഷണം പോയത്. ജോബി എന്നും ഫ്ലാറ്റിൽ നിന്ന് ഗ്രൗണ്ടിലേക്ക് പോകുന്നതും വരുന്നതും ഈ സൈക്കിളിലാണ്. പരിശീലനം കഴിഞ്ഞ് ഫ്ലാറ്റിന്റെ താഴെ സൈക്കിൾ വയ്ക്കും. എന്നാൽ നാട്ടങ്കത്തിന് മുൻപ് ടീം ഹോട്ടലിലേക്ക് മാറാൻ നിൽക്കേ സൈക്കിൾ കാണാതായി.
മത്സരത്തിന്റെ തിരക്കിലായതിനാൽ ആരോടും പരാതി പറയാൻ നിന്നില്ല. മത്സര ശേഷം ഇക്കാര്യം എല്ലാവരേയും അറിയിച്ചു. മോഹൻ ബഗാനെതിരെ ടീമിനെ ജയിപ്പിച്ച ജോബിക്ക് ഒരു പുതിയ സൈക്കിൾ നൽകാമെന്ന് ഈസ്റ്റ് ബംഗാളിന്റെ ഒരു കടുത്ത ആരാധകൻ വാഗ്ദാനം ചെയ്തു. അതോടെ ജോബിയും ഹാപ്പി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ