ലണ്ടന്‍: അവിസ്മരണീയമായൊരു അട്ടിമറിക്ക് വിംബിള്‍ഡണ്‍ ടെന്നീസ് വേദി സാക്ഷിയായി. വിംബിള്‍ഡണിന്റെ പ്രധാന പോരാട്ടത്തിന് യോഗ്യത നേടുന്ന ഏറ്റവും പ്രായം കുറഞ്ഞ താരമെന്ന റെക്കോര്‍ഡുമായി കന്നി ഗ്രാന്‍ഡ് സ്ലാം പോരിനിറങ്ങിയ അമേരിക്കയുടെ കൊറി ഗഫ് അരങ്ങേറ്റം തന്നെ അവിസ്മരണീയമാക്കി.
വിംബിള്‍ഡണ്‍ പോരാട്ടത്തിന്റെ ആദ്യ റൗണ്ടില്‍ തന്നെ 15കാരിയായ കൊറി വിജയം കൊയ്തു. പരാജയപ്പെടുത്തിയതാകട്ടെ നാട്ടുകാരിയും അഞ്ച് തവണ വിംബിള്‍ഡണ്‍ കിരീടം സ്വന്തമാക്കുകയും ചെയ്ത സാക്ഷാല്‍ വീനസ് വില്ല്യംസിനെ!
1991ന് ശേഷം ആദ്യ റൗണ്ട് വിജയിക്കുന്ന ഏറ്റവും പ്രായം കുറഞ്ഞ താരമെന്ന റെക്കോര്‍ഡും 15കാരി സ്വന്തമാക്കി. രണ്ട് സെറ്റ് പോരാട്ടത്തില്‍ 6-4, 6-4 എന്ന സ്‌കോറിനാണ് കൊറി വിജയം സ്വന്തമാക്കിയത്.
കൊറി ജനിക്കും മുന്‍പ് രണ്ട് തവണ വിംബിള്‍ഡണില്‍ കിരീടം സ്വന്തമാക്കിയ താരമാണ് വീനസ്. വിജയിച്ച ശേഷം അത് വിശ്വസിക്കാനാകാതെ കൊറി ആനന്ദ കണ്ണീര്‍ പൊഴിച്ചു.
തിങ്കളാഴ്ച വീനസിനെ തോൽപ്പിച്ച് ആരാധകരെ അമ്പരപ്പിച്ച കൊറി ബുധനാഴ്ച സ്കൂളിൽ ചെന്ന് സയൻസ് പരീക്ഷ എഴുതാനുള്ള തയ്യാറെടുപ്പിലാണ്. എന്തായാലും ഭാവിയുടെ ടെന്നീസ് പ്രതിഭ എന്ന് ആരാധകര്‍ ഇപ്പോള്‍ തന്നെ താരത്തെ വാഴ്ത്തിക്കഴിഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
