ലണ്ടൻ: വെസ്റ്റ്ഇൻഡീസ് ഓൾറൗണ്ടർ ആന്ദ്രെ റസൽ ലോകകപ്പിൽനിന്നു പുറത്ത്. ഇടത് കാൽമുട്ടിനേറ്റ പരിക്കാണ് കാരണം. ടോപ് ഓർഡർ ബാറ്റ്സ്മാൻ സുനിൽ ആംബ്രിസിനെ റസലിനു പകരക്കാരനായി വെസ്റ്റ്ഇൻഡീസ് ടീമിൽ ഉൾപ്പെടുത്തി.
ഈ ലോകകപ്പിൽ നാലുമത്സരങ്ങളിൽ നിന്നായി ഇതുവരെ ആന്ദ്രെ റസൽ അഞ്ചുവിക്കറ്റ് നേടിയിട്ടുണ്ട്.ആന്ദ്രെ റസലിന്റെ അഭാവം വെസ്റ്റ് ഇൻഡീസിന് തിരിച്ചടിയാകുമെന്നാണ് വിലയിരുത്തൽ. റസലിന് പകരക്കാരനായി വരുന്ന ആംബ്രിസ് 27ന് ഇന്ത്യക്കെതിരെയുളള മത്സരത്തിന് മുൻപ് ടീമിനൊപ്പം ചേരും.
പരിക്ക് പൂർണമായി ഭേദമാകാതെ കളിച്ചതുമൂലം കഴിഞ്ഞ മത്സരങ്ങളിൽ റസലിന് മികച്ച പ്രകടനം കാഴ്ചവെയ്ക്കാൻ സാധിച്ചിരുന്നില്ല. ന്യൂസിലൻഡിനെതിരായ മത്സരത്തിൽ റസലിനു പകരക്കാരനായി എത്തിയ കാർലോസ് ബ്രാത്വെയ്റ്റാകട്ടെ തകർപ്പൻ സെഞ്ചുറി കുറിക്കുകയും ചെയ്തു. വെസ്റ്റ് ഇൻഡീസിന് വേണ്ടി ആംബ്രിസ് ആറു ടെസ്റ്റുകളും ആറു ഏകദിനങ്ങളും കളിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
