സഞ്ജു സാംസണിന്റേയും ശിഖര്‍ ധവാന്റേയും വെടിക്കെട്ടായിരുന്നു സൗത്ത് ആഫ്രിക്ക എയ്‌ക്കെതിരായ അവസാന ഏകദിനത്തില്‍ കാര്യവട്ടത്തെ ആരാധകരെ കാത്തിരുന്നത്. സഞ്ജുവിന്റെ മിന്നും പ്രകടനം കണ്ടതിന്റെ സന്തോഷത്തില്‍ നില്‍ക്കുന്ന ആരാധകരില്‍ വീണ്ടും കൗതുകം തീര്‍ത്ത് എത്തുകയാണ് ധവാന്റേയും സഞ്ജുവിന്റേയും ഇന്‍സ്റ്റഗ്രാമിലെ സംസാരങ്ങള്‍.
സൗത്ത് ആഫ്രിക്ക എയ്‌ക്കെതിരായ അവസാന ഏകദിനത്തിന് ഇടയില്‍ ധവാന്റെ തലയില്‍ ബൗണ്‍സര്‍ കൊണ്ടിരുന്നു. ഈ സമയം നോണ്‍ സ്‌ട്രൈക്കേഴ്‌സ് എന്‍ഡില്‍ നിന്നത് നമ്മുടെ സഞ്ജുവും. ഇതിന്റെ വീഡിയോ ധവാന്‍ ഇന്‍സ്റ്റഗ്രാമില്‍ പങ്കുവെച്ചു. അതിന് കമന്റുമായി എത്തിയാണ് സഞ്ജു കളിക്കിടയിലെ അവരുടെ സംഭാഷണം വെളിപ്പെടുത്തിയത്.
ബൗണ്‍സര്‍ തലയില്‍ കൊണ്ടതിന് ശേഷം, ആ പന്തിന് എന്തെങ്കിലും പറ്റിയോന്ന് നോക്ക്, അത് പൊട്ടിയിട്ടുണ്ടാവും എന്നാണ് ക്രീസില്‍ വെച്ച് ധവാന്‍ പറഞ്ഞത് എന്നാണ് സഞ്ജു പറയുന്നത്.
പരിക്കേറ്റെങ്കിലും അര്‍ധശതകം തികച്ചാണ് ധവാന്‍ മടങ്ങിയത്. സഞ്ജുവാകട്ടെ സെലക്ടര്‍മാരുടെ കണ്ണില്‍ ഇടംപിടിക്കാന്‍ ലഭിച്ച അവസരം തകര്‍ത്ത് വിനിയോഗിക്കുകയും ചെയ്തു. 48 പന്തിലാണ് സഞ്ജു 91 റണ്‍സ് എടുത്തത്. സഞ്ജുവിന്റേയും ധവാന്റേയും മികവില്‍ സൗത്ത് ആഫ്രിക്ക എയ്‌ക്കെതിരായ പരമ്പര 4-1ന് ഇന്ത്യ എ സ്വന്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
