മുർഗാവ്: ഐഎസ്എല്ലിലെ ഇന്നത്തെ മത്സരത്തിൽ ജംഷേദ്പുർ എഫ്സിയെ തകർത്ത് എഫ്സി ഗോവ. ആദ്യം ഒരു ഗോളിന് പിന്നിൽ നിന്നെങ്കിലും ശക്തമായി തിരിച്ചെത്തിയ ഗോവൻ താരങ്ങൾ രണ്ടു ഗോളുകൾക്ക് ജയം കൈയ്യിലൊതുക്കി. ഒന്നിനെതിരേ രണ്ടു ഗോളുകൾക്കായിരുന്നു ഗോവയുടെ ജയം. ഇഗോൾ അംഗുളോയാണ് ഗോവൻ നിരയിൽ രണ്ടു ഗോളുകളും നേടിയത്.
തുടക്കത്തിൽ മികച്ച മുന്നേറ്റം പുറത്തെടുത്ത ജംഷേദ്പുർ 33-ാം മിനിറ്റിൽ ഗോവയുടെ ഗോൾവല കുലുക്കി. പ്രതിരോധ നിര താരം സ്റ്റീഫൻ എസെയാണ് ജംഷേദ്പുരിനായി ഗോൾ നേടിയത്. ആദ്യ പകുതിയിൽ ഗോൾ നേടാനാകാതെ തകർന്ന ഗോവ രണ്ടാം പകുതിൽ ആക്രമണം പുറത്തെടുത്തു. 64-ാം മിനിറ്റിൽ ഗോവയുടെ സമനില ഗോൾ പിറന്നു. ജെയിംസ് ഡൊണാക്കിയെ അലക്സാൺഡ്രെ ലിമ വീഴ്ത്തിയതിന് ലഭിച്ച പെനാൽറ്റി ഇഗോൾ അംഗുളോ വലയിലെത്തിച്ചു.
അധിക സമയത്തിന്റെ അഞ്ചാം മിനിറ്റിലായിരുന്നു ഗോവയുടെ വിജയഗോൾ. എഡു ബേഡിയയുടെ കോർണറിൽ നിന്നെത്തിയ പന്ത് അംഗുളോയുടെ തലയ്ക്ക് പിന്നിൽ തട്ടി വലയിലെത്തുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ