ഇംഗ്ലണ്ട് ലെഗ് സ്പിന്നര്‍ ആദില്‍ റാഷിദിന് മുന്‍പില്‍ കോഹ് ലി കുടുങ്ങിയ നിമിഷം വീണ്ടും ആരാധകരെ ഓര്‍മിപ്പിച്ചാണ് ഇംഗ്ലണ്ട് ക്രിക്കറ്റ് സമൂഹമാധ്യമങ്ങളിലെത്തുന്നത്. നിങ്ങള്‍ നേരിട്ടതില്‍ ഏറ്റവും മികച്ച ഡെലിവറിയല്ലേ ഇതെന്ന് കോഹ് ലിയോട് ചോദ്യവുമെത്തുന്നുണ്ട്.
എറൗണ്ട് ലെഗില്‍ പിച്ച് ചെയ്ത് എത്തിയ പന്ത് കോഹ് ലിയുടെ ഓഫ് സ്റ്റംപ് തെറിപ്പിക്കുകയാണ്. കുത്തി തിരിഞ്ഞെത്തിയ പന്ത് സ്റ്റംപ് തൊട്ടത് കണ്ട് വിശ്വസിക്കാനാവാതെ ഇന്ത്യന്‍ നായകന്‍ അവിടെ നിന്ന് പോയി. 2018ലെ ഇംഗ്ലണ്ടിനെതിരായ മൂന്നാം ഏകദിനത്തിലായിരുന്നു ആദില്‍ റാഷിദിന്റെ തകര്‍പ്പന്‍ ഡെലിവറി.
71 റണ്‍സ് എടുത്ത് നില്‍ക്കുകയായിരുന്നു കോഹ് ലി ആ സമയം. മറ്റൊരു ഏകദിന സെഞ്ചുറിയും ഇന്ത്യക്ക് മികച്ച ടോട്ടലും കോഹ് ലി അവിടെ ലക്ഷ്യം വെച്ചെങ്കിലും ആദില്‍ റാഷിദിന്റെ സ്പിന്നിന് മുന്‍പില്‍ അടിതെറ്റി. ഞാന്‍ എറിഞ്ഞതില്‍ വെച്ച് എനിക്കേറ്റവും സംതൃപ്തി നല്‍കിയ ഡെലിവറിയായിരുന്നു അതെന്നാണ് ആദില്‍ റാഷിദ് പറഞ്ഞിട്ടുള്ളത്.
അതുപോലൊരു ഡെലിവറി എറിയാനാണ് എപ്പോഴും നമ്മള്‍ ശ്രമിക്കുക. അന്നത് സാധിച്ചു. അതും കോഹ് ലിയെ പോലൊരു ബാറ്റ്‌സ്മാന് എതിരെ, റാഷിദ് പറഞ്ഞു. ആ പരമ്പരയിലെ ആദ്യ ഏകദിനത്തിലും കോഹ് ലിയുടെ വിക്കറ്റ് റാഷിദ് വീഴ്ത്തിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
