മാഞ്ചസ്റ്റര്‍ യുനൈറ്റഡ് താരം പോഗ്ബയ്ക്ക് വേണ്ടി റയല്‍ മാഡ്രിഡ്. മാര്‍ടിന്‍ ഒഡെഗാര്‍ഡ്, ഹാമിസ് റോഡ്രിഗ്‌സ് ഉള്‍പ്പടെ നാല് താരങ്ങളെ പകരം തരാമെന്ന ഓഫറാണ് മാഞ്ചസ്റ്റര്‍ യുനൈറ്റഡിന് മുന്‍പില്‍ റയല്‍ വെച്ചിരിക്കുന്നത് എന്നാണ് റിപ്പോര്‍ട്ട്.
പോഗ്ബയില്‍ റയല്‍ പരിശീലകന്‍ സിനദിന്‍ സിദാനുള്ള താത്പര്യം വ്യക്തമാണ്. എന്നാല്‍ ഈ അടുത്ത് ക്ലബിലേക്ക് എത്തിച്ച ബ്രുണോ ഫെര്‍നാന്‍ഡെസിനൊപ്പം ഓള്‍ട്രഫോഡില്‍ പോഗ്ബ കളിക്കണം എന്നതില്‍ ഉറച്ച് നില്‍ക്കുകയാണ് മാഞ്ചസ്റ്റര്‍ യുനൈറ്റഡ് പരിശീലകന്‍ ഒലെ സോള്‍ഷെയര്‍. പോഗ്ബയെ വിട്ടുനല്‍കാന്‍ തയ്യാറല്ലെന്ന നിലപാട് തുടരുകയാണ് മാഞ്ചസ്റ്റര്‍ യുനൈറ്റഡ് എന്നാണ് ദി സണ്‍ റിപ്പോര്‍ട്ട് ചെയ്യുന്നത്.
ഹാമിഷ് റോഡ്രിക്‌സ്, മാര്‍ട്ടിന്‍ അഡെഗാര്‍ഡ്, ലൂക്കാസ് വാസ്‌ക്വിസ്, ബ്രാഹിം ഡയസ് എന്നിവരെയാണ് പോഗ്ബയ്ക്ക് വേണ്ടി റയല്‍ വിട്ടുനല്‍കാന്‍ ഒരുങ്ങുന്നത്. ക്രിസ്റ്റിയാനോ പോയതിന് ശേഷം സൂപ്പര്‍ താരത്തെ ടീമിലെത്തിക്കാനുള്ള റയലിന്റെ ശ്രമങ്ങള്‍ വിജയം കണ്ടിട്ടില്ല.
ഹസാര്‍ഡ് ബെര്‍നാബ്യൂവിലേക്ക് എത്തിയെങ്കിലും പരിക്ക് വില്ലനായതോടെ തുടക്കം മങ്ങി...നെയ്മറിനായി നേരത്തെ റയല്‍ രംഗത്തുണ്ടായിരുന്നെങ്കിലും ഇപ്പോള്‍ പോഗ്ബയിലേക്കാണ് മുന്‍ ഫ്രാന്‍സ് താരം കൂടിയായ സിദാന്റെ കണ്ണ് എന്നാണ് ട്രാന്‍സ്ഫര്‍ വിപണിയിലെ റിപ്പോര്‍ട്ടുകള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
