സിഡ്‌നി: ഇന്ത്യ-ഓസ്‌ട്രേലിയ പരമ്പരയില്‍ കളിക്കുമ്പോള്‍ പ്ലേസ്റ്റേഷന്‍ പോലെ തോന്നിയതായി ഓസീസ് യുവ താരം വില്‍ പുകോവ്‌സ്‌കി. 2011ലെ രാജ്യാന്തര ക്രിക്കറ്റ് പോലെയോ, പ്ലേസ്റ്റേഷന്‍ പോലെയോ തോന്നിയതായാണ് വില്‍ പുകോവ്‌സ്‌കി പറയുന്നത്.
ആ സമയം ഷെയ്ന്‍ വാട്‌സനെയായിരുന്നു എനിക്ക് ഇഷ്ടം. ഷെയ്ന്‍ വാട്‌സന്‍ ഓപ്പണ്‍ ചെയ്യുമ്പോള്‍ ഈ അന്തരീക്ഷമായിരിക്കും. ബാറ്റ്‌സ്മാന് മുകളില്‍ സ്‌പൈഡര്‍ ക്യാം വരുന്നത് എനിക്ക് ഇഷ്ടമാണ്, പുകോവ്‌സ്‌കി പറയുന്നു.
ഇപ്പോഴും പ്ലേസ്റ്റേഷന്‍ ഗെയിം കളിക്കുമ്പോള്‍ ആഷസ് ക്രിക്കറ്റില്‍ ഏത് വര്‍ഷമാണെങ്കിലും വാട്‌സന്റെ 100 ഉണ്ടാവും. സ്‌കൂളില്‍ പോകാതെ ഞാന്‍ അന്ന് കളി കണ്ട ഒരു ദിവസമാണ് അത്. അതുകൊണ്ട് എനിക്കതെല്ലാം നല്ല ഓര്‍മയുണ്ട്. ഷെയ്ന്‍ വാട്‌സനായി നിന്ന് ഇംഗ്ലണ്ടിനെ പ്ലേസ്റ്റേഷനില്‍ നേരിട്ടപ്പോഴുള്ളത് പോലെ അനുഭവമായിരുന്നു എനിക്ക് എതിരെ ബൂമ്ര ബൗള്‍ ചെയ്യാന്‍ എത്തിയപ്പോള്‍...പുകോവ്‌സ്‌കി പറഞ്ഞു.
കരിയറിലെ തന്റെ ആദ്യ ടെസ്റ്റില്‍ തന്നെ പുകോവ്‌സ്‌കി മികവ് കാണിച്ചിരുന്നു. ഇന്ത്യക്കെതിരെ 110 പന്തുകള്‍ നേരിട്ട പുകോവ്‌സ്‌കി 62 റണ്‍സ് ആണ് നേടിയത്. 97 പന്തില്‍ നിന്ന് അവിടെ തന്റെ കരിയറിലെ ആദ്യ അര്‍ധ ശതകം നേടിയ പുകോവ്‌സ്‌കി ക്രിക്കറ്റ് ലോകത്തിന്റെ കയ്യടി നേടിയാണ് മടങ്ങിയത്. 53.41 ആണ് പുകോവ്‌സ്‌കിയുടെ ഫസ്റ്റ് ക്ലാസ് ക്രിക്കറ്റിലെ ബാറ്റിങ് ശരാശരി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
