‘ലാലേട്ടാ‘ എന്ന് വിളിച്ച് ആർ അശ്വിന്റെ മറുപടി; തിരക്കിനിടയിലും ദൃശ്യം 2 കണ്ടതിന് നന്ദി പറഞ്ഞ് മോഹൻലാൽ

ചെന്നൈ: മോഹൻലാൽ നായകനായ മലയാള ചിത്രം ദൃശ്യം വലിയ പ്രേക്ഷക പിന്തുണ ലഭിച്ച് മുന്നേറുകയാണ്. ഒടിടി പ്ലാറ്റ്ഫോമിൽ റിലീസ് ചെയ്ത ചിത്രത്തിന് വലിയ കൈയടിയാണ് ലഭിച്ചത്. ഇന്ത്യൻ സ്പിന്നർ രവിചന്ദ്രൻ അശ്വിനടക്കമുള്ള താരങ്ങളും സിനിമയെ പുകഴ്ത്തി രം​ഗത്തെത്തിയത് ശ്രദ്ധേയമായിരുന്നു. 

ഇപ്പോഴിതാ താരത്തിന്റെ അഭിനന്ദന ട്വിറ്റർ പോസ്റ്റിന് മറുപടിയുമായി രം​ഗത്തെത്തിയിരിക്കുകയാണ് മോഹൻലാൽ. അദ്ദേഹത്തിന്റെ മറുപടി ട്വീറ്റ് ലാലേട്ടൻ എന്ന് അഭിസംബോധന ചെയ്ത് അശ്വിൻ റീട്വീറ്റ് ചെയ്തതും ഇപ്പോൾ വൈറലായി മാറി. രാജ്യാന്തര മത്സരങ്ങളുടെ തിരക്കിനിടയിലും ആദ്യ ആഴ്ച തന്നെ ദൃശ്യം 2 കാണാൻ സമയം കണ്ടെത്തിയ അശ്വിന് നന്ദിയറിയിച്ചാണ് മോഹൻലാൽ ട്വീറ്റ് ചെയ്തത്. 

‘ദൃശ്യം 2ൽ മോഹൻലാൽ അവതരിപ്പിച്ച ജോർജ്കുട്ടി കോടതിക്കുള്ളിൽ സൃഷ്ടിച്ച ട്വിസ്റ്റ് കണ്ട് ഉച്ചത്തിൽ ചിരിച്ചുപോയി. ഇതുവരെ കാണാത്തവർ ദൃശ്യം ഒന്നു മുതൽ കാണുക. മികച്ച ചിത്രമാണ്. വളരെ മികച്ച ചിത്രം’ – ഇതായിരുന്നു അശ്വിൻ ട്വിറ്ററിൽ കുറിച്ച വാക്കുകൾ.

Lalettan https://t.co/Y9CBU4SZKo

— Ashwin (@ashwinravi99) February 23, 2021

പിന്നാലെയാണ് മോഹൻലാലിന്റെ മറുപടി. ‘വലിയ തിരക്കുകൾക്കിടയിലും ദൃശ്യം 2 കാണാനും അതേക്കുറിച്ച് നല്ല വാക്കുകൾ പറയാനും സമയം കണ്ടെത്തിയതിന് നന്ദി. താങ്കളുടെ ഈ പ്രവൃത്തി ഞങ്ങളുടെയെല്ലാം പ്രതീക്ഷകളെപ്പോലും മറികടന്നു. താങ്കളുടെ കരിയറിന് എല്ലാ ആശംസകളും’ – മോഹൻലാൽ കുറിച്ചു.

താരത്തിന്റെ ഈ നന്ദി ട്വീറ്റാണ് ‘ലാലേട്ടൻ’ എന്ന വിളിയോടെ അശ്വിൻ ഇന്ന് പങ്കുവച്ചത്. അശ്വിന്റെ രണ്ട് ട്വീറ്റുകളും ഇപ്പോൾ വൈറാലായി മാറിയിരിക്കുകയാണ്.

I laughed out loud when George Kutty @Mohanlal created that twist in the court #Drishyam2 . If you guys dint, please start all over again from #Drishyam1. Fabulous!! Just fabulous

— Ashwin (@ashwinravi99) February 21, 2021