ടോക്യോ: ഒളിംപിക്‌സില്‍ ഇന്ത്യക്ക് വന്‍ തിരിച്ചടി. റിയോ ഒളിംപിക്‌സിലെ വെള്ളി മെഡല്‍ ജേതാവും ഇന്ത്യന്‍ ബാഡ്മിന്റണ്‍ സെന്‍സേഷനുമായ പിവി സിന്ധു സെമിയില്‍ തോല്‍വി വഴങ്ങി.
ചൈനീസ് തായ്‌പേയ് താരം തായ് സു യിങിനോടാണ് സിന്ധു തോല്‍വി വഴങ്ങിയത്. ലോക ഒന്നാം നമ്പര്‍ താരമായ തായ് രണ്ട് ഗെയിം മാത്രം നീണ്ട പോരാട്ടത്തില്‍ സിന്ധുവിനെ അനായാസം വീഴ്ത്തി. സ്‌കോര്‍: 18- 21, 12-21.
ആദ്യ ഗെയിമില്‍ മികച്ച രീതിയില്‍ മുന്നേറാന്‍ സിന്ധുവിന് സാധിച്ചെങ്കിലും ഗെയിമിന്റെ അവസാന ഘട്ടത്തില്‍ തായ് ശക്തമായി തിരിച്ചെത്തി ഗെയിം 18-21 ന് സ്വന്തമാക്കി. എന്നാല്‍ രണ്ടാം ഗെയിമില്‍ സിന്ധു ഒരു ഘട്ടത്തിലും ചൈനീസ് തായ്‌പേയ് താരത്തിന് വെല്ലുവിളി ഉയര്‍ത്തിയില്ല.
ഇനി വെങ്കല മെഡല്‍ പോരാട്ടം ബാക്കിയുണ്ട്. നാളെ വൈകീട്ട് അഞ്ച് മണിക്കാണ് വെങ്കല മെഡലിനായി സിന്ധു മത്സരിക്കാനിറങ്ങുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
