പാരിസ്: പിഎസ്ജി താരം നെയ്മറിന്റെ ഫിറ്റ്‌നസിനെ ചൂണ്ടി ഫ്രഞ്ച് മാധ്യമങ്ങള്‍ ചോദ്യം ഉയര്‍ത്തിയിരുന്നു. ബ്രസീല്‍ സുപ്പര്‍ താരത്തിന് അമിത ഭാരമാണെന്നായിരുന്നു വിമര്‍ശനം. എന്നാല്‍ അതെല്ലാം ചിരിച്ചു തള്ളിയാണ് ഇപ്പോള്‍ ക്രിസ്റ്റിയാനോയുടെ പ്രതികരണം വരുന്നത്.
വ്യാഴാഴ്ച ലോകകപ്പ് യോഗ്യതാ മത്സരത്തില്‍ ചിലിക്കെതിരെ നെയ്മര്‍ കളിച്ചിരുന്നു. കഴിഞ്ഞ ആഴ്ച റെയിംസിന് എതിരായ മത്സരത്തിന് പിന്നാലെയാണ് നെയ്മര്‍ക്ക് നേരെ അമിത വണ്ണം എന്ന നിലയില്‍ വിമര്‍ശനങ്ങള്‍ ഉയര്‍ന്നത്.
ഇന്‍സ്റ്റഗ്രാം സ്റ്റോറിയിലൂടെയാണ് അമിത വണ്ണത്തെ കുറിച്ച് ഉയര്‍ന്ന ചോദ്യങ്ങള്‍ക്ക് നെയ്മറുടെ മറുപടി. നമ്മള്‍ നമ്മായി കളിച്ചോ? ഇല്ല! നമ്മള്‍ ജയിച്ചോ? യെസ്! ആ ഷര്‍ട്ടിന്റെ സൈസ് ജി ആണ്, അടുത്ത കളിയില്‍ ഞാന്‍ എം സൈസ് ഓര്‍ഡര്‍ ചെയ്യും, ചിരിക്കുന്ന ഇമോജികള്‍ക്കൊപ്പം നെയ്മര്‍ കുറിച്ചു.
ലാറ്റിനമേരിക്കന്‍ ലോകകപ്പ് യോഗ്യതാ മത്സരത്തില്‍ അര്‍ജന്റീനക്കെതിരെയാണ് ബ്രസീല്‍ ഇനി ഇറങ്ങുന്നത്. തിങ്കളാഴ്ചയാണ് ബ്രസീല്‍-അര്‍ജന്റീന മത്സരം. എട്ട് കളിയില്‍ എട്ടും ജയിച്ച് പോയിന്റ് ടേബിളില്‍ ഒന്നാമതാണ് ബ്രസീല്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
