ന്യൂയോർക്ക്: 21ാം ഗ്രാൻഡ് സ്ലാം കിരീടമെന്ന സ്വപ്ന നേട്ടത്തിലേക്ക് കൂടുതൽ അടുത്ത് ലോക ഒന്നാം നമ്പർ താരം സെർബിയയുടെ നൊവാക് ജോക്കോവിച്. യുഎസ് ഓപ്പൺ ടെന്നീസ് പോരാട്ടത്തിന്റെ ക്വാർട്ടറിലേക്ക് ജോക്കോ മുന്നേറി. മേജർ ടൂർണമെന്റുകളിൽ ഈ വർഷത്തെ തുടർച്ചയായ 25ാം ജയമെന്ന നേട്ടത്തോടെയാണ് താരത്തിന്റെ മുന്നേറ്റം.
പ്രീ ക്വാർട്ടറിൽ അമേരിക്കയുടെ ജെൻസൺ ബ്രൂക്ക്സ്ബൈക്കിനെയാണ് ജോക്കോ വീഴ്ത്തിയത്. നാലു സെറ്റുകൾ നീണ്ടുനിന്ന പോരാട്ടത്തിനൊടുവിലായിരുന്നു താരത്തിന്റെ വിജയം. ആദ്യ സെറ്റ് നഷ്ടപ്പെട്ട ശേഷം ഉജ്ജ്വലമായി തിരിച്ചടിച്ചാണ് താരം വിജയം സ്വന്തമാക്കിയത്. സ്കോർ: 1-6, 6-3, 6-2, 6-2. ഇറ്റലിയുടെ മത്തിയോ ബെരെറ്റിനിയാണ് ക്വാർട്ടറിൽ ജോക്കോയുടെ എതിരാളി.
ജെൻസൺ ബ്രൂക്ക്സ്ബൈയുടെ തോൽവിയോടെ യുഎസ് ഓപ്പണിൽ നിന്ന് അവസാന അമേരിക്കൻ താരവും പുറത്തായി. 1880ന് ശേഷം ഇതാദ്യമായാണ് ഒരു പ്രധാന ടെന്നീസ് ടൂർണമെന്റിൽ ആതിഥേയ രാജ്യത്തെ താരങ്ങളാരും തന്നെ ക്വാർട്ടർ ഫൈനലിലെത്താതിരിക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ